mias>> llamenta les condiciones
del Asturies-España de balonmano
La organización moza considera que l’alcuentru nun va pasar de ser un entrenamientu más pa la selección española nel qu’una amenorgada Asturies fadrá de sparring
29/11/2007 >> Al traviés d’esti comunicáu de prensa, Mocedá d’Izquierda Asturiana (mias>>) quier mostrar el so malcontentu col partíu que güei sábadu 29 d’avientu van xugar les selecciones deportives de balonmano d’Asturies y España n’Avilés.
La imposibilidá de que la selección asturiana cuente colos sos meyores xugadores y la intransixencia del equipu técnicu español nesti sentíu, convierte a l’asturiana nun potencial sparring énte la “toupoderosa” España.
D’esta forma queda claro que lo que prima nesti alcuentru ye la máxima expresión del paternalismu d’una selección sobre la otra, manifestación que ta nel polu opuestu a la mesma celebración d’un partíu d’estes característiques y que d’otru llau, pon en xaque los mínimos principios de toa competición que se tenga por deportiva.
Pa mias>>, la Dirección Xeneral de Deportes ta desendolcando unes maneres neglixentes pa los intereses asturianos y demuestra asina que la esistencia de les selecciones deportives asturianes nun ye más que la imitación vacia en conteníos de lo qu’asocede n’otros territorios del Estáu, faciendo qu’Asturies quede, de nueves, a la cola de les iniciatives que tengan que ver col desarrollu de la propia identidá y la trasferencia de soberanía nos asuntos de mayor interés pa la ciudadanía, como ye’l casu del espectáculu deportivu.
Poro, Mocedá d’Izquierda Asturiana solicita:
- Que la Dirección Xeneral de Deportes garantice la dignidá de la representación asturiana nes cites que vengan.
- Que se dean pasos alantre nel afitamientu de la selección asturiana de balonmano cola meyora de les condiciones de trabayu y concentración previes de los xugadores y técnicos.
- Que se marque un calendariu de partíos a disputar a curtiu, mediu y llargu plazu, entamando una dinámica competitiva qu’asiente socialmente la esistencia de la selección asturiana mesmo en balonmano que n’otres disciplines deportives.
Estaya de Comunicación
Mocedá d'Izquierda Asturiana
Uviéu, a 29 d'avientu de 2007
contauta con nós
Mocedá d'Izquierda Asturiana 2007 |
