MANIFIESTU REPUBLICANISTA DE MIAS>>

¿MONARQUÍA? NON, GRACIES

            Mocedá d’Izquierda Asturiana (MIAS>>) fai una crítica reflexón sobre'l papel que xuega anguaño la institución de la monarquía nel Estáu Español. MIAS valora mui negativamente que la reinstauración de la monarquía xurdiese nun ambiente ensin llibertá y con munchos mieos pola situación política nel que se desendolcó'l referéndum del testu constitucional de 1978.

            La monarquía ye una institución ayena a la tradición democrática con unes estructures y una filosofía más propia de tiempos pretéritos que d’un estáu modernu. Pa les moces y mozos de MIAS la monarquía  ye sinónimu despilfarru, imposición, sexismu, privilexu y arcaísmu. Un Estáu modernu nun puede tener como cabezaleru a un personaxe designáu por un dictador faciendo continuismu del autoritarismu. La xefatura del Estáu nun puede ser un negociu familiar nin una institución arbitraria.

            Mocedá d’Izquierda Asturiana (MIAS>>) nun acepta:

            I. Una monarquía instaurada por un dictador calteniendo unes estructures inxustes y non democrátiques.

            II. Una monarquía creada pa caltener privilexos y una oligarquía dañina pa la democracia y la sociedá participativa.

            III. Una monarquía que ye contraria a la igualdá, la xusticia social, la participación ciudadana y la independencia relixosa.

            IV. Una monarquía que devalua los valores democráticos y se beneficia de los recursos económicos de toles ciudadanes y  ciudadanos.

Asinamesmo, MIAS revindica la República como forma de gobiernu y modelu pa cualquier país. Mocedá d’Izquierda Asturiana sofita una  República que defenda los valores humanistes de solidaridá, dignidá humana y respetu al mediu ambiente escontra l'individualismu, la discriminación y la oligarquía caciquil.

Uviéu, 12 de payares de 2006

contauta con nós

Mocedá d'Izquierda Asturiana 2006