Por una Universidá pública, asturiana y de calidá.

La educación al serviciu del neolliberalismu
Les multinacionales, el capital, van tener un pesu abultable na toma de determinos de les universidaes de forma que la educación va convertise en una simple marioneta al serviciu de les necesidaes del mercáu y non de la sociedá. Esto quier dicir que cualisquier multinacional o gran empresa estatal o nacional va poder decidir en temes como la asignación presupuestaria nos títulos que más-yos interesen.
Dende IAS/MIAS proponemos una Universidá al serviciu de la sociedá asturiana, onde los intereses educativos nun tean lligaos a les decisiones del capital priváu.

El desprestixu de la enseñanza pública.
Según Madrid la enseñanza pública ye de segunda categoría. Dende l'entamu de la LOGSE les/os estudiantes vimos como la enseñanza primaria y secundaria yera rebaxada tantu a nivel presupuestariu como a nivel educativu. Agora cola L.O.U. preténdese que pase lo mesmo cola universidá. Los centros privaos d'enseñances universitaries van ser los primeros beneficiaos, ya que van ser ellos los qu'entamen a llucrase por mor d'esta perda de calidá.
Dende IAS/MIAS nun queremos que la universidá pública seya "la cenicienta" de la educación. Proponemos una Universidá pública onde toes/os podamos algamar una enseñanza de calidá; onde les diferencies económiques nun seyan motivu de discriminación.

Por una Universidá Asturiana

IAS/MIAS quier una universidá al serviciu d'Asturies, una universidá que reflexe les aspiraciones de la sociedá asturiana nel so enfotu por salir d'esti ermu frutu de polítiques xacobines. Desiximos una Universidá que puxe polos intereses d'Asturies, non la universidá que mos quieren imponer dende'l gobiernu central. Una universidá ASTURIANA onde la cultura del nuesu pueblu tea presente en toles estayes de la so vida y onde l'asturianu seya llingua d'usu.