Qué ye mias>>?

mias>> somos un grupu de xente mozo que facemos por esparder una conciencia crítica colo que nos arrodia dende una perpectiva asturiana y d'izquierda. Pa nós la Xusticia Social y la Soberanía del nuestru país son les exes de la nuestra actividá. Actividá que tien de ser fecha por y pa la mocedá asturiana, amosando que n'Asturies somos munches/os les/os que nun tamos d'alcuerdu col modelu actual, que nun vemos con bonos güeyos "l'autonomía" ruina y emprestada que nos "regala" l'Estáu español, que nun asumimos como igua al nuestru futuru la emigración, nin la explotación de los trabayos basoria. Que nun callamos frente a la discriminación sexista que les moces sufrimos, nin a la implantación cuasi colonial de multinacionales, nin al esfarrape del nuestru mediu ambiente...

Queremos da-y al nuestru país otra traza, otru sentir. Queremos una Asturies respetuosa col mediu, ensin xéneros, que s'enfrente a la globalización del beneficiu pa cuatro, pa mundializar los derechos sociales y llaborales. Una Asturies arguyosa de la so identidá, de la so llingua y la so cultura, una Asturies soberana, dueña del so futuru y qu'apueste pola democracia participativa con una ciudadanía protagonista de les decisiones que-y afecten. Una Asturies llibre, onde la opción sexual nun sea torga pal desenvolvimentu social.

Queremos ser ser la mocedá que trabaye por otra Asturies, l'Asturies de la xusticia y de la llibertá. Ente toes y toos vamos contruyir l'Asturies que vien...

Soberanía

>>Nesti momentu nel que se plantega una redefinición del modelu d'estáu, queremos facer ver que nun tamos d’alcuerdu cola autonomía ruina y emprestada que mos da l’Estáu español, qu’apostamos por un país dueñu del so futuru, por una Asturies soberana. La mocedá asturiano tien que demostrar el so esmolecimientu pol papel d’Asturies dientro del mundu y tener voz propio ellí onde’l nuesu grau d’autoxestión tea en debate, nun podemos quedar fuera del diseñu del nuesu propiu destín. Somos un país, con una historia, una identidá, una cultura y un idioma que tienen que reconocese y potenciase.

>> Ensin autonomía fiscal nun hai autonomía política. La mocedá asturiano tien que tener la so presencia nel modelu económicu del país. Les moces y los mozos hemos tener voz y participación na politica económica d’Asturies. La economía va ser un instrumentu d’ameyoramientu de la calidá de vida en toles estayes de la sociedá, incluyida la mocedá. Asina, ye pernecesario crear un nuevu marcu económicu n’Asturies nel qu’apostar por un modelu económicu de desarrollu sustentable onde amás del xorrecimientu económicu, tengamos presentes la xusticia social, la proteición del mediu ambiente, la cooperación internacional y el desarrollu cultural del país. Un modelu fechu dende Asturies y p'Asturies; nin copiáu d'otros nin impuestu por intereses ayenos al nuestru.

>> Esta ye la nuesa idega p’Asturies porque pensamos que ye la meyor vía pa salir d’una situación que fai de nós lo último en posibilidaes del denomináu “mundu desarrolláu”, un país hasta agora acomplexáu, que tien qu’entamar a creyese y a respetase. Esti ye’l meyor camín p’aseguranos un futuru dignu nel que tolos asturianos y toles asturianes tengamos capacidá de decisión nun país meyor, solidariu, xustu y ecolóxicu, abiertu al mundu y a recibir a los nuevos asturianos. Porque equí, nun sobra naide.

Xusticia social

>> Les conquistes sociales, que tantos años y sufrimientu costaron, tán cuestionándose y perdiéndose en pocu tiempu. Dende mias>> creyemos que pa tornar esta situación fai falta garantizar los derechos básicos: derechu a un marcu de rellaciones llaborales dignu; derechu a la sanidá y a la enseñanza públiques, gratuites, llaiques y de calidá; a los derechos individuales ensin discriminación de xéneru, raza o opción sexual...

>>Dientro d’una sociedá patriarcal como la nuesa pareznos urxente un fondu cambiu de perspectiva. Les moces d’Asturies hemos entamar a diseñar nueves llinies na busca d’una igualdá que llegue más llonxe de les habituales campañes institucionales qu’amuesen unos resultaos perprobes en cuantes a llogros reales. mias>> apuesta pola eliminación del xéneru no que se refier a oportunidaes sociales y llaborales, y pa ello, vamos siguir faciendo pola coeducación y por caltener el debate abiertu siempres, sollertes a les inxusticies que nesti sen se producen davezu. Del mesmu mou que queremos superar les diferencies de xéneru p’afitar la igualdá d’oportunidaes, vamos trabayar pola equiparación de los drechos de gais, llesbianes y tresexuales, defendiendo ensin dubia’l matrimoniu, les pareyes de fechu y la capacidá d’adopción de guah.es, y  lluchando con tou tipu de midíes empobinaes a la normalización social de les rellaciones  homosexuales y de la práctica tresexual.

>> mias>> quier un país abiertu dafechu al esterior, nel que se trabaye pola educación empobinao a valorar la riqueza de les otres cultures y a facer entender a la nuesa población el drechu de los inmigrantes a vivir nel nuesu país teniendo esactamente les mesmes condiciones y oportunidaes que los que ñacimos equí, garantizándo-yos un réxime d’igualdá y xusticia social. Dende la mocedá trabayamos en collaboración con asociaciones d’ayuda al inmigrante desenvolviendo les campañes d’información, formación y sofitu que seyan precises, quedando al serviciu d’esti colectivu y dirixendo la nuesa principal atención a los y a les inmigrantes más xóvenes y a los sectores con mayor riesgu de marxinación social.

Ecoloxía

>> N’Asturies somos munchos los que tamos fartos de ver como afuraquen los nuesos montes, como empuerquen los nuesos ríos, como semen de torretes los nuesos praos, pa marchar con tol beneficiu lloñe del nuesu país.

>> Ye imposible imaxinar un país modernu y con futuru ensin ver la necesidá de polítiques verdes que mos saquen de la situación actual d’irresponsablidá y despreocupación respective al mediu. mias>> quier que la mocedá alquiera los compromisos ecolóxicos imprescindibles pa construyir el desarrollu d’Asturies ensin siguir esfarrapando la naturaleza. Llega’l momentu d’apostar bramante poles enerxíes renovables y llimpies y por un nuevu conceptu de modernización (medios de comunicación y tresporte, turismu, montañismu, espor, materiales de construcción...) nel que’l mediuambiente puea caltenese y recuperase. Apoyamos la educación ecolóxica y la concienciación social no verde, asina como les midíes controladores de toa triba na proteición mediuambiental.

contauta con nós

Mocedá d'Izquierda Asturiana 2006