Oficialidá: Simplemente iguales

 

Dende Izquierda Asturiana facemos un llamáu a la participación esti vienres 5 de mayu –coincidiendo cola celebración del Día de les Lletres Asturianesna manifestación pola oficialidá del asturianu y del gallego-asturiano convocada pola Xunta pola Defensa de la Llingua Asturiana como actu d’afirmación colectiva, de compromisu, de llealtá y de voluntá d’un futuru pa la nuesa llingua.genaro-alonso

Otru añu más tenemos, por desgracia, que volver a repetir per escrito lo que venimos diciendo y reivindicando dende cuantayá. Nun podemos dicir otro que pa la llingua asturiana namás hai promeses incumplíes una y otra vegada –l’aprobación de la especialidá docente–, retrocesos claros nel enseñu –la optatividá de l’asignatura enfrentada a Cultura Asturiana, perdiendo d’esti mou la voluntariedá reflexada na Llei d’Usu– y fueos artificiales como la “vehicularidá” del asturianu –más bien la impartición “esperimental” de dalguna asignatura n’asturianu, nunos pocos de centros– o la incorporación del asturianu a la Educación Infantil, que yá veremos cómo se fai. A esto amestamos los incumplimientos na toponimia, los problemes col estatus llegal de l’ALLA –el so financiamientu y vinculación col Principáu-, xunto con una programación probetaya na RTPA y dalgo de xuegos florales nesta selmana y tenemos un resume completu del añu.

Nun queremos cayer nel pesimismu y menos nun derrotismu inútil, pero la realidá ye fosca y necia, y l’inmovilismu, la provisionalidá permanente de tolo que cinca a la llingua asturiana y les posiciones zarraes de la clas política, xorda a la sociedá, nun dexen albidrar nada bono énte esti panorama. Cuando’l PP se chufa de prohibir el so usu na Xunta Xeneral pa “evitar la imposición del asturianu” o quier velu fuera de la escuela, pocu futuru quieren pa la nuesa llingua. Cuando dende’l gobiernu se caltién, dende hai cuasi 40 años, esa provisionalidá del asturianu en toles estayes (institucionales, académiques, enseñu, medios de comunicación…) y vien incumpliéndose sistemáticamente la Llei d’Usu y tolo que tenga que ver col emplegu del asturianu, pocu futuru quieren. Asina, pasu ente pasu, faciendo como que se fai, ensin llegar a facer daveres, pasa’l tiempu y lleven, dende l’alministración, al asturianu pel camín del desaniciu, oxetivu final d’esti mal facer.

Persabemos que la oficialidá nun ye, nin pue ser, un fin por sí mesma, nin ye la solución máxica a tolos problemes del asturianu, pero ensin esta marcación xurídica y llegal que nos equipararía col restu de llingües cooficiales del estáu español, poco vamos poder facer p’avanzar apode y llograr una normalización social real de la llingua asturiana y del gallego-asturiano.

 

Los comentarios están cerrados.