Yá ta entamada la “segunda transición”

El réxime del 78 intenta una operación de “gattopardismo” pa torgar un procesu constituyente.

El réxime del 78 intenta una operación de “gattopardismo” pa torgar un procesu constituyente.

L’abdicación güei, llunes 2 de xunu, del monarca español impuestu por Francisco Franco ye un saltu cualitativu nel intentu de la oligarquía española de caltener el control del timón d’un réxime qu’agoniza. Pese a los intentos de presentar la socesión como daqué natural cuando hasta va díes s’aventuraba como imposible dende los mesmos medios y sectores qu’agora la ven lóxica, ye evidente que ye un pasu meditáu pa intentar reconducir una situación que lleva podreciendo cuantayá y qu’amenaza con llevar per delantre al mesmu réxime de la II Restauración.

Nun sabemos, y tampoco nun ye importante porque nun ye determinante, si l’abdicación de Juan Carlos de Borbón ye consecuencia d’un agravamientu de la so salú. Lo que ye evidente ye que dexar pasu a Felipe de Borbón como nuevu rei val pa intentar rellanzar la imaxe de la institución monárquica, absolutamente desprestixada nestos postreros años. Too ello nel contestu de la crisis del réxime, cuando empecipien a madurar les condiciones polítiques pa la so superación. Les marches de la dignidá del 22M amosaron que’l refugu al réxime ta na so cota más alta dende la so instauración. Les eleiciones al parlamentu européu amosaron que tamién nel terrén electoral la desafección al turnismu yá ye mayoritaria. El réxime intenta recuperar la iniciativa con una nueva figura na xefatura del estáu, menos chiscada polos escándalos de corrupción y d’otru tipu, que se someterá a una operación de márquetin políticu onde se faga por recuperar la épica de la llamada Transición de los años setenta, con llamaos al consensu y con un previsible gobiernu de concentración PSOE-PP pa pilotar esi segundu viaxe al mesmu sitiu. Siguir lleendo

Izquierda Asturiana (IAS) énte les elecciones europees

Elecciones Europees 2014Esti 25 de mayu, fecha histórica na que se conmemora’l llevantamientu del pueblu asturianu en 1808 escontra la potencia que dominaba daquella’l continente européu, l’Imperiu Francés, coincide paradóxicamente coles elecciones al Parllamentu européu. Estes elecciones danse nun contestu d’agravamientu de la crisis de llexitimidá que tienen tanto’l réxime español como la propia UE, en medio de movilizaciones sociales perfuertes tanto n’Asturies como en bona parte d’Europa, y podíen ser una bona ocasión pa dir perfilando un programa realmente alternativu pa los pueblos del continente.

Por desgracia, nestes elecciones nun se ta falando de lo que la UE supunxo y supón p’Asturies. Nun se ta falando de cómo l’ingresu del Reinu d’España na CEE fíxose, ente otres coses, empara d’esmantelar el texíu productivo que yera’l motor de la economía asturiana dende diba más d’un sieglu. Nun se fala de los millones en fondos europeos que llegaron al nuestru país y que s’alministraron de forma ineficaz y corrupta, de cómo nun s’usaron pa rexenerar el texíu productivo sinón pa facer obres faraóniques que teníen como única xustificación el fechu mesmu de faceles, lo mesmo que p’armar una rede clientelar cola qu’articular mayoríes electorales. Nun se fala de la moneda único y de lo que supunxo pa los pueblos del continente, nin de los intentos de centralización d’un proyectu políticu, la UE, que nació como superestructura económica del gran capital francoalemán, como tampoco se fala del inminente Tratáu de Llibre Comerciu ente la UE y los USA, qu’implica una impunidá tovía mayor de les multinacionales y que va tener consecuencies catastrófiques nel ámbitu llaboral, ambiental y de la salú. Siguir lleendo

Soliedariedá col CSOA La Madreña

madrenha--647x231

L’Audiencia “Provincial” anunció esti miércoles un autu qu’ordena’l desallugu del edificiu de la cai General Elorza d’Uviéu onde ta anguaño’l Centru Social Ocupáu Autoxestionáu La Madreña. Esto supón un pasu más na criminalización de la protesta social, la impunidá de la corrupción urbanística y la instrumentalización del poder xudicial como ferramienta de dominiu social, que pon los intereses privaos perriba de los colectivos.

Esti edificiu, onde n’otru tiempu taba la Conseyería de Sanidá del gobiernu asturianu, privatizóse de forma irregular en 2007 vendiéndolu a la empresa SEDES pa llevantar nel solar viviendes de luxu. L’aniciu de la crisis fexo aparar el proyectu y l’inmueble quedó abandonáu hasta payares de 2011, cuando s’ócupó de forma pacífica y se convirtió nel centru social La Madreña.

El CSOA La Madreña tresformóse en menos de tres años nun dinamizador social perfuerte non solo del barriu de Pumarín nel que ta allugáu, sinón de la ciudá d’Uviéu, asina como nun referente pa too Asturies, al llau d’otros centros socialess. Ye la prueba viviente de que ye posible criar un espaciu autoxestionáu y independiente basáu nel llabor y la responsabilidá colectiva. Por eso ye peligrosu.

El problema cola Madreña nun ye tanto económicu, porque persábese que va avagar hasta que’l proyectu inmobiliariu seya mínimamente rentable, sinón ideolóxicu: ye intolerable pal poder, pal indecente comiciu públicu-priváu onde se mueve la nuestra oligarquía, permitir que’l pueblu organizáu-y quite un espaciu físicu onde se desenvuelva un llabor alternativu y onde se fai visible que lo que se fexo col edificiu ye perfeutamente posible y necesario facelo tamién nuna montonera d’edificios zombies, auténtiques reliquies de la burbuya inmobiliaria, espardíos per tol territoriu asturianu.

Por too ello, dende Izquierda Asturiana (IAS) queremos amosar tola nuestra solidariedá cola xente del CSOA La Madreña y apoyar públicamente cualesquier iniciativa que tenga como oxetivu caltener l’usu social del edificiu.

OFICIALIDÁ (O OFICIALIDÁ: LLINGUA Y ACCIÓN)

Uviéu. Vienres 9 de mayu, a les 19:30 h. Dende La Estación del Norte hasta'l Teatru Campoamor. Con motivu del Día de Les Lletres Asturianes. Convoca la Xunta pola Defensa de la Llingua Asturiana.

Uviéu. Vienres 9 de mayu, a les 19:30 h. Dende La Estación del Norte hasta’l Teatru Campoamor. Con motivu del Día de Les Lletres Asturianes. Convoca la Xunta pola Defensa de la Llingua Asturiana.

Esti vienres 9 de mayu, la reivindicación de la oficialidá y normalización del asturianu vuelve salir a la cai nuna nueva manifestación, convocada pola Xunta pola Defensa de la Llingua Asturiana, na que ciudadanos, colectivos de llealtá llingüística, asociaciones culturales, sindicatos y partíos políticos volveremos andar el centru d’Uviéu reclamando un futuru pal nuestru idioma.

A lo llargo d’estos años, mientres la sociedá foi pasín ente pasu acoyendo’l mensaxe, ensin mieu y meyorando la conciencia y actitúes sociollingüístiques –como lo demuestren les encuestes feches– los grupos políticos mayoritarios dirixíos hasta’l momentu por elites provincianes falsamente cosmopolites intoxicaes polos sos prexuicios y complexos, miren pa otru llau y fainse los sordos énte esta demanda social d’igualdá de derechos civiles.

Podrán refugar la existencia de la cuestión llingüística, podrán dicir qu’equí ye too paz y harmonía, onde too guarda un orde natural, nesti repartu desigual de papeles y funciones y que dir un pasu más allá supón abrir les puertes a nun se sabe qué plagues y llaceries, invocando al diañu de la obligación y la imposición, al costu económicu –y más nesta época de crisis (d’estafa) económica omnipresente– y otres falcatrúes. Podrán dicir que nun hai demanda social, cuantificada pa ellos como votos nunes urnes, demostrando’l so despreciu pa la sociedá civil dexando la democracia como un exerciciu ximnásticu electoral cada daqué tiempu y dando’l llombu’l restu del tiempu a cualquier demanda social que nun diga colos sos intereses particulares, produza réditos o venga de determinaos “lobbys” y grupos de presión.

Frente a esto, frente a esta negación de la realidá per parte de la castra política autóctona sucursalista, l’únicu camín posible ye siguir alantre col llabor continuu y constante de defensa de los nuesos derechos llingüísticos y esixir la oficialidá de la llingua asturiana –y del gallego-asturiano- pasu necesariu na normalización social de la mesma.

Ye daqué tan simple como la reconocencia d’un derechu civil de tola ciudadanía. El derechu de la población asturfalante a emplegar la llingua propia y el derechu de tolos asturianos y asturianes a acceder a la mesma, a deprendela, usala y querela Derechu de tolos ciudadanos asturianos y asturianes: los que falen, los que yá nun lo falen o los que tán acabantes de llegar a Asturies.

Un derechu tien que tener un refrendu llegal que garantice la tresmisión xeneracional. Coses tan cencielles como l’emplegu del asturianu nos medios de comunicación con una TPA n’asturianu, col enseñu garantizáu del asturianu y n’asturianu na educación y con un usu real y non simbólicu na alministración o na toponimia…

En definitiva, facer normal lo que va yá años que tendría que lo ser.