también en castellano

PROPUESTES

El 14 de marzu celébrense les elecciones xenerales y la ciudadanía asturiana paez condergada a escoyer los sos representantes ente los mesmos responsables de la so situación. Izquierda Asturiana (IAS) preséntase a estes elecciones porque entendemos que les fuercies polítiques que lleven venticinco años dominando la política asturiana amás de nun ser pa iguar los problemes del nuestru país, van agravalos más tovía y criar otros nuevos. Porque fai falta dir poniendo les bases pa qu'una fuercia asturianista como IAS pueda dir construyendo una alternativa que defenda los intereses d'Asturies, como yá tán faciendo otros pueblos.

L'ASTURIES QUE TENEMOS

Nun fai falta ser un espertu pa decatase de les graves carencies de la sociedá asturiana: l'empléu ye cada vez más precariu y miles d'asturianos y asturianes, sobre too xente mozo y mui cualificao, tien qu'emigrar fuera d'Asturies pa ganar la vida.

Asistimos enquizaos a la voladura controlada de los sectores tradicionales qu'emburriaron la economía asturiana, ensin que nueves alternatives xeneradores d'empléu y riqueza vengan a sustituyilos, lo que fai qu'a munches de les persones que deciden o nun tienen más remediu que quedar n'Asturies-yos empeoren les condiciones de vida y tengan un trabayu más precariu. Entaina cada vez más la privatización de los servicios públicos. Sigue la estroza mediuambiental con nueves actividaes contaminantes, obres d'infraestructures faraóniques o un urbanismu xabaz. Los elementos que conformen la nuestra identidá como pueblu, y mui especialmente la llingua, muerren adulces, y frente a too eso, atopamos que nes instituciones nun hai quien llevante una voz asturiana que defenda'l nuestru futuru como una nación enfotada en selo ente los pueblos d'Europa.

Vivimos nuna Asturies improductiva onde los fondos que teníen que valir pa rexenerar l'actividá productiva y entamar una recuperación económica y social d'Asturies, úsense en caltener infames redes clientelares qu'alimenten el votu cautivu, anestesien la opinión pública y afueguen les espresiones más dinámiques de la sociedá civil. Vivimos nun país subvencionáu polos mesmos que dinamitaron l'actividá económica y pretenden agora reprochanos que nun la tengamos, nun país estrozáu cultural y económicamente, domesticáu y espoliáu historicamente por unos intereses que nunca miraron po les nueses necesidaes.

Les persones que formamos Izquierda Asturiana (IAS) apostamos por otra Asturies, una Asturies productiva, solidaria y asturiana, basada na rexeneración del texíu económicu con criterios de sostenibilidá, enfotada en xenerar condiciones sociales que valgan pa tornar la sangría demográfica y la marxinación d'amplios sectores sociales, qu'aseguren el futuru y actualización de la nuestra identidá. Pa qu'esa otra Asturies seya posible, necesitamos otru modelu políticu basáu nuna soberanía fiscal que mire tamién poles nuestres especiales condiciones históriques de marxinación económica: Cuando tamos a puntu d'entrar nun nuevu debate sobre la configuración territorial del Estáu, Asturies nun pue ser como hai venticinco años la convidada de piedra que llega tarde. Los culpables d'esta situación siguen apostando por un modelu de rellaciones col Estáu que perpetúa la sumisión y afuega les potencialidaes d'esti país.

EL VOTU ÚTIL

Vamos asistir a una campaña mui polarizada y basada na falsa elección ente la derecha (PP) y una presunta izquierda tan cobarde como pa nun cuestionar dende'l raigañu el discursu dominante. Ente una derecha y una presunta izquierda igual de sucursalizaes y d'impotentes pa pensar en clave asturiana. Dende Izquierda Asturiana (IAS) creyemos que ye indispensable francer esa dinámica y apostar por nueves alternatives.

Nesta campaña vamos ver llamaos constantes al votu útil. Ye bien verdá que ye útil votar al PP pa que nun gane el PSOE, y votar al PSOE (y a los sos subalternos) pa que nun gane'l PP. Ye útil pa tolos políticos y empresarios abonaos al comederu. Pero pa una moza emigrante, un trabayador en precario o una autónoma afogada polos impuestos y la competencia de les cadenes multinacionales, pa daquién que piense qu'Asturies tien que ser el centru de l'axenda política, nun ye útil votar polos que son responsables de la so situación. El votu útil ye'l que val pa cambiar les coses. Y votando al PP o al PSOE y subalternos nun van cambiar. Van quedar igual o pior.

ÉSTA YE LA TUYA

Yá ye hora de que nunes elecciones xenerales falemos de llevar los problemes d'Asturies a Madrid y non de que los problemes de la clase política en Madrid marquen la nuestra axenda. Izquierda Asturiana (IAS) preséntase a estes elecciones col slogan "Ésta ye la tuya" pa tresmitir un doble mensaxe: qu'esta ye la to fuercia política, l'asturianismu que quier el poder pa la mayoría social asturiana, y qu'ésta ye la to oportunidá pa que te sientan bien fuerte dici-yos que yá valió,que ye'l momentu d'apostar pol futuru d'Asturies. Col to votu, y col to compromisu.

Exes programáticos

El futuru d'Asturies tien que decidilu el pueblu asturianu

Nesti momentu nel que se plantea un redefinición del modelu d'estáu, Asturies nun pue quedar otra vez ensin voz. Somos un país, con una historia, una identidá, una cultura y un idioma que tienen que reconocese y potenciase. Izquierda Asturiana (IAS) propón un verdaderu autogobiernu fiscal p'Asturies, pa que podamos xestionar los nuestros impuestos. Ensin autonomía fiscal nun hai autonomía política. Necesitamos una fiscalidá afayadiza coles nuestres característiques sociales y xusta pa cola nuesa marxinación histórica; que caltenga'l nivel de vida de los nuestros conciudadanos y conciudadanes. Un modelu fechu dende Asturies y p'Asturies; nin copiáu d'otros nin impuestu por intereses ayenos al nuestru.

Por un nuevu modelu económicu, sostenible y xustu

L'actual modelu económicu, basáu n'obres faraóniques, en dexanos como'l pulmón enerxéticu pal desarrollu de terceros, en subvencionar la implantación de multinacionales y grandes superficies, na cultura de la subvención, supón la precarización del mercáu de trabayu -especialmente pa la mocedá y les muyeres-, l'estropiciu planificáu del mediu ambiente, la despoblación rural, la emigración y la ruina de la les pequeñes empreses y autónomos. N'Izquierda Asturiana apostamos por una economía sostenible, que xenere y reparta la riqueza, priorizando la economía social y l'autoempléu, que nun hipoteque los recursos naturales y que caltenga la estructura tradicional del territoriu.

Polos nuestros derechos sociales

Les conquistes sociales, que tantos años y sufrimientu costaron, tán cuestionándose y perdiéndose en pocu tiempu. Dende Izquierda Asturiana creyemos que pa tornar esta situación fai falta garantizar los derechos básicos: derechu a un marcu de rellaciones llaborales dignu; derechu a la sanidá y a la enseñanza públiques, gratuites y de calidá; a los derechos individuales ensin discriminación de xéneru, raza o opción sexual.. Necesitamos una política que dea respuesta al problema de la vivienda dende criterios sostenibles y non especulativos y precisamos una rede de servicios sociales que priorice la calidá de vida y les prestaciones pa tola ciudadanía.

Por un modelu diferente d'Alministración

Que ponga a la mano de toos y toes, predicando col exemplu, la educación ética, los valores d'igualdá el consumu responsable y la cultura; que facilite la participación democrática y la tresparencia; que mire pol patrimoniu y planifique'l territoriu en función del bien común. Pa que podamos dexar un país vivu, dignu y meyor a los que vengan detrás. Pa que podamos dicir qu'Asturies sigue esistiendo nel futuru.

DELLES PROPUESTES CONCRETES

1. Trabayu. Eliminación de la precariedá y la inseguridá nel trabayu. Xornada de 35 hores. Creación d’un marcu asturianu de rellaciones llaborales. Priorización del fomentu de la economía social y solidaria. Equiparación del sistema de protección social de los trabayadores autónomos col réxime xeneral. Aumentu del SMI a 660 euros d’alcuerdo colos encamientos de la Carta Social Europea.

2. Mediu ambiente. Cumplimientu del protocolu de Kioto. Paralización de les nueves llinies d’alta tensión. Política enerxética con criterios sostenibles y de descentralización de la producción dende una perspertiva que nun faiga d’Asturies un nuevu “pulmón enerxéticu” basáu en conceptos desarrollistes qu’afonden nel estropiciu mediu ambiental d’Asturies. Estudiu y desarrollu d’una fiscalidá ambiental.

3. Agricultura , ganadería y pesca. Revitalización del campu asturianu como un apueste de cohesión territorial. Defensa de l'agricultura y la ganadería ecolóxiques y les esplotaciones con criterios sostenibles. Prohibición de les artes de pesca dañibles. Defensa d’ayudes complementaries pa los modelos d’esplotación agrarios y ganaderos autóctonos asturianos amenazaos pol marcu que manda la última reforma de la PAC, siempre con criterios de fixación de la población. Equiparación del réxime especial agrariu col de la seguridá social.

4. Consumu responsable. Midies pa potenciar una nueva cultura de consumu basada na sostenibilidá. Potenciación de la cultura del reciclax y por baxar la producción de basoria nun 50%.

5.Muyer. Discriminación positiva p’algamar la plena igualdá de la muyer en tolos ámbitos, Plan de choque contra la violencia de xéneru. Por un nuevu modelu de rellación ente homes y muyeres. Afalar la igualdá salarial ente homes y muyeres. Apueste pola coeducación nel ámbitu formativu. Establecimientu d’auditoríes sobre la discriminación de xéneru en diferentes instancies y organismos públicos y privaos.

6. Sanidá. Sanidá pública que garantice una asistencia universal gratuita y de calidá. Frenu a la privatización encubierta. Revisión del criteriu de financiación atendiendo a les particularidaes xeográfiques asturianes. Control del gastu farmacéuticu. Tarxeta sanitaria a nivel estatal y na Unión Europea. Incorporación de les medicines alternatives a los planes formativos y n’atención primaria. Interrupción voluntaria del embarazu en cualquier supuestu.

7. Servicios Sociales.Llei Básica de Servicios sociales qu’estableza'l calter de servicios suxetivos y universales les sos prestaciones. Aumentu de la protección hasta algamar la media europea.

8. Mayores. Pensión mínima nunca más baxa que’l SMI. Ayudes a les families y rede de residencies gratuites o a precios asequibles. Planificación xerontolóxica que faiga digna la vida a esti sector de la población tan importante n’Asturies.

9.Discapacidá. Apueste públicu y un marcu normativu eficaz pa la plena integración de les persones con discapacidaes físiques o psíquiques, con especial incidencia nel trabayu o la vivienda.

10. Vivienda. Asegurar el derechu universal a la vivienda dende una concepción sostenible, priorizando la rehabilitación y l’alquiler. Creación d’un patrimoniu de suelu públicu que permita construir pisos sociales, alloñándose de los criterios especulativos.

11. Educación. Derogación de la LOCE, la Llei de la Formación Profesional y la LOU. Defensa del calter públicu y laicu de la escuela. Reconocimientu de los becarios na Universidá d’investigación como trabayadores. Aumentu de les partíes d’I+D y desmilitarización de la investigación. Incrementu de les ayudes al estudiu hasta ponese na media de la UE y tresferencia a Asturies de competencies plenes en materia d’ayudes al estudiu . Aconfesionalidá del Estáu y de la Educación.

12. Cultura. Supresión del Ministeriu de Cultura y tresformación del mesmu nuna Secretaría d’Estáu: Supresión progresiva del IVA nos productos culturales. Fin de la discriminación d’Asturies nes partíes con cargu al 1% cultural y l’arbitrariedá n’aplicación de les mesmes. Trespasu progresivu a Asturies de monumentos y edificios d’interés cultural que tan baxo titularidá española. Devolución de los documentos incautaos en Salamanca y de tol patrimoniu asturianu guardáu nel Muséu Arqueolóxicu de Madrid que pasaríen a depender d’un Archivo Nacional Asturianu.

13. TIC. Accesu universal a les nueves tecnoloxíes como forma d’espardimientu de la democracia y la igualdá. Xeneralización del software llibre. Reforma de la LSSI. Espardimientu de la banda ancha a les zones rurales y liquidación definitiva de la rede de telefonía celular. Apoyu al usu y producción de conteníos nes otres llingües del estáu.

14. Llingua. Usu de la llingua asturiana en toa Asturies por parte de l’alministración periférica del estáu y de la Xusticia. Cooficialidá en tol estáu toles llingües ente les qu’ha d’inxerise l’asturiana.. Potenciación de la llingua asturiana a nivel internacional. Pagu del estáu en conceptu de delda histórica. Aplicación de la Carta Europea de les Llingües Minoritaries. Creación del puestu xurídicu de Llingua asturiana en tolos centros educativos públicos d’Asturies. Convocatoria d’oposiciones pa la cobertura d’estes places.

15 Mocedá. Renta mínima moza. Eliminación de les prautiques abusives na contratación y les práctiques non remuneraes. Política de drogues non basada nel prohibicionismu y política de sexualidá basada na información y el respetu. Política de vivienda específica pa la mocedá. Más en “21 propuestes moces” de MIAS.

16. Política esterior/coperación/paz. Salida inmediata de les tropes d’Iraq. Política de neutralidá activa. Refugu del modelu d’intervención preventiva. Desmilitarización de la ciencia. Defensa de la Europa de los Pueblos. Fin al sofitu a procesos d’implantación de dictadures encubiertes como en Colombia y otros países americanos. Collaboración con países en procesos de rexeneración democrática. Oposición al plan ALCA.

17. Participación ciudadana. Xeneralización progresiva y reglada del presupuestu participativu. Desbloquéu candidatures electorales. Sustitución de les provincies poles comunidaes autónomes como circunscripciones electorales. Mayores facilidaes pa proponer ILPs. Facultá normativa pa les comunidaes autónomes pa convocar referendums.

18. Igualdá. Matrimoniu y adopción reconocíu pa gais y lesbianes. Educación na igualdá.

19. Inmigración. Modificación de la Llei d’estranxería Política d’acoyida humanitaria que vea al inmigrante llegal o illegal como persona con derechos y que se conxugue con polítiques pa desfacer les desigualdaes d’orixe.

20. Emigración. Estatutu del Trabayador Emigráu y un censu rial d’emigrantes. Ayudes al retornu, como una Formación Profesional específica, cursos de reclicax llaboral y asistencia psicolóxica, subsidiu pa la xente retornao equivalente al SMI y con una duración mínima de dos años.

21. Modelu d’Estáu. Reconocimientu del calter plurinacional, pluricultural y plurillingüísticu del Estáu, con Asturies como una de les identidaes nacionales reconocíes. Reconocimientu de la soberanía de les partes integrantes del Estáu. Presencia directa nos órganos de xestión na UE. Reforma del Senáu.

22. Economía. Redefinición de los criterios de distribución del Fondu de Compensación Interterritorial, inxiriendo criterios como’l paru o la dispersión poblacional a la hora de l’asignación de recursos y inxertando nueves variables como la de “zona en reconversión” o la variable de “avieyamientu de la población”. Descentralización fiscal per aciu del control pola facienda asturiana de lo más de los impuestos qu’agora recalda l’Estáu. Caltenimientu d’Asturies como rexón Oxetivu 1 de la UE.. Impulsu al I+D+I y llucha contra la deslocalización y el dumping social. Fomentu del comerciu xustu. Negociación d’una delda histórica col estáu. Defensa d’un modelu económicu sostenible. Reforma fiscal que grave les rentes más altes y penalice los beneficios fiscales especuladores. Llucha contra’l fraude fiscal. El poder públicu o la planificación nun debe tar sometíu a les imposiciones de les grandes empreses.

23. Tresporte. Apueste pola intermodalidá de tresportes y comunicaciones, cola collaboración de l’alministración central y autonómica dientro d’un plan estratéxicu de movilidá . Trespasu a Asturies de la xestión del aeropuertu de Ranón y mayor participación de la CA na xestión de los puertos del estáu. Plan estratéxicu pa la meyora de les llinies de FEVE con vistes al so trespasu a la comunidá autónoma . Apueste pol ferrocarril como mediu de tresporte de futuru frente a la privatización de los sos servicios. Cambéu del trazáu occidental de l’autovía del cantábricu. Rescate de la concesión de l’autopista del Güerna.

24. Comerciu. Defensa del pequeñu comerciu énte les grandes superficies. Derogación inmediata'l Decretu de lliberalización d’horarios comerciales que va implicar la desregulación dafechu nel 2005. Plan d’apoyu al pequeñu comerciu xestionáu poles Comunidaes Autónomes y los conceyos tendente a dinamizar y modernizar al comerciu de proximidá.