Izquierda Asturiana (IAS). Ésta ye la tuya

IZQUIERDA ASTURIANA (IAS) anició allá pel añu 1992, cuandu dellos ex-militantes de la yá desapaecida Unidá Nacionalista Asturiana (UNA) que nun iguaben cola estratexa abandonista d'esti partíu entamaren el procesu pa constituyir, a mediu plazu, una nueva organización politica qu'axuntare nun proyectu común I'espaciu políticu d'una izquierda soberanista, socialista y ecoloxista, estremada tanto del nacionalismu interclasista como de la izquierda sucursalista y españolista.

EI primer pasu seriu pa la constitución d'IZQUIERDA ASTURIANA comu partíu pólíticu dióse cola celebración del I Alcuentru Nacional, conceyu constituyente fechu ente Payares de 1994 y Xineru de 1995, nel que s'aprobó un documentu-base, les Propuestes Constituyentes, que marca les llinies xenerales del nuestru proyectu y actividá política.

IZQUIERDA ASTURIANA fundóse col enfotu de cubrir una ausencia enforma notable nel nuestru mapa políticu, esto ye, la d'una organización d'izquierdes y, a un tiempu, netamente asturiana, soberana. Nun ye IAS, evidentemente, el primer intentu nesa dirección. Yá a lo postrero de los años setenta surdieron los primeros partíos de la izquierda nacionalista, si bien ye cierto que la constancia y la coherencia nel mensaxe nun fo precisamente lo que más definió a estes organizaciones.

Tratando de recoyer la esperiencia y el llabor d'estos años, y sintiendo la necesidá evidente d'iguar un modelu alternativu a l'actual situación de dependencia y estrozu económicu que vive Asturies, IZQUIERDA ASTURIANA naz comu una organización nueva, estremada dafechu de les corrientes polítiques dominantes:

Nun fai falta ser un espertu pa decatase de les graves carencies de la sociedá asturiana: l'empléu ye cada vez más precariu y miles d'asturianos y asturianes, sobre too xente mozo y mui cualificao, tien qu'emigrar fuera d'Asturies pa ganar la vida.

Asistimos enquizaos a la voladura controlada de los sectores tradicionales qu'emburriaron la economía asturiana, ensin que nueves alternatives xeneradores d'empléu y riqueza vengan a sustituyilos, lo que fai qu'a munches de les persones que deciden o nun tienen más remediu que quedar n'Asturies-yos empeoren les condiciones de vida y tengan un trabayu más precariu. Entaina cada vez más la privatización de los servicios públicos. Sigue la estroza mediuambiental con nueves actividaes contaminantes, obres d'infraestructures faraóniques o un urbanismu xabaz. Los elementos que conformen la nuestra identidá como pueblu, y mui especialmente la llingua, muerren adulces, y frente a too eso, atopamos que nes instituciones nun hai quien llevante una voz asturiana que defenda'l nuestru futuru como una nación enfotada en selo ente los pueblos d'Europa.

Vivimos nuna Asturies improductiva onde los fondos que teníen que valir pa rexenerar l'actividá productiva y entamar una recuperación económica y social d'Asturies, úsense en caltener infames redes clientelares qu'alimenten el votu cautivu, anestesien la opinión pública y afueguen les espresiones más dinámiques de la sociedá civil. Vivimos nun país subvencionáu polos mesmos que dinamitaron l'actividá económica y pretenden agora reprochanos que nun la tengamos, nun país estrozáu cultural y económicamente, domesticáu y espoliáu historicamente por unos intereses que nunca miraron po les nueses necesidaes.

Les persones que formamos Izquierda Asturiana (IAS) apostamos por otra Asturies, una Asturies productiva, solidaria y asturiana, basada na rexeneración del texíu económicu con criterios de sostenibilidá, enfotada en xenerar condiciones sociales que valgan pa tornar la sangría demográfica y la marxinación d'amplios sectores sociales, qu'aseguren el futuru y actualización de la nuestra identidá. Pa qu'esa otra Asturies seya posible, necesitamos otru modelu políticu basáu nuna soberanía fiscal que mire tamién poles nuestres especiales condiciones históriques de marxinación económica: Cuando tamos a puntu d'entrar nun nuevu debate sobre la configuración territorial del Estáu, Asturies nun pue ser como hai venticinco años la convidada de piedra que llega tarde. Los culpables d'esta situación siguen apostando por un modelu de rellaciones col Estáu que perpetúa la sumisión y afuega les potencialidaes d'esti país.

Nesti momentu nel que se plantea un redefinición del modelu d'estáu, Asturies nun pue quedar otra vez ensin voz. Somos un país, con una historia, una identidá, una cultura y un idioma que tienen que reconocese y potenciase. Izquierda Asturiana (IAS) propón un verdaderu autogobiernu fiscal p'Asturies, pa que podamos xestionar los nuestros impuestos. Ensin autonomía fiscal nun hai autonomía política. Necesitamos una fiscalidá afayadiza coles nuestres característiques sociales y xusta pa cola nuesa marxinación histórica; que caltenga'l nivel de vida de los nuestros conciudadanos y conciudadanes. Un modelu fechu dende Asturies y p'Asturies; nin copiáu d'otros nin impuestu por intereses ayenos al nuestru.

L'actual modelu económicu, basáu n'obres faraóniques, en dexanos como'l pulmón enerxéticu pal desarrollu de terceros, en subvencionar la implantación de multinacionales y grandes superficies, na cultura de la subvención, supón la precarización del mercáu de trabayu -especialmente pa la mocedá y les muyeres-, l'estropiciu planificáu del mediu ambiente, la despoblación rural, la emigración y la ruina de la les pequeñes empreses y autónomos. N'Izquierda Asturiana apostamos por una economía sostenible, que xenere y reparta la riqueza, priorizando la economía social y l'autoempléu, que nun hipoteque los recursos naturales y que caltenga la estructura tradicional del territoriu.

Les conquistes sociales, que tantos años y sufrimientu costaron, tán cuestionándose y perdiéndose en pocu tiempu. Dende Izquierda Asturiana creyemos que pa tornar esta situación fai falta garantizar los derechos básicos: derechu a un marcu de rellaciones llaborales dignu; derechu a la sanidá y a la enseñanza públiques, gratuites y de calidá; a los derechos individuales ensin discriminación de xéneru, raza o opción sexual.. Necesitamos una política que dea respuesta al problema de la vivienda dende criterios sostenibles y non especulativos y precisamos una rede de servicios sociales que priorice la calidá de vida y les prestaciones pa tola ciudadanía.

Que ponga a la mano de toos y toes, predicando col exemplu, la educación ética, los valores d'igualdá el consumu responsable y la cultura; que facilite la participación democrática y la tresparencia; que mire pol patrimoniu y planifique'l territoriu en función del bien común. Pa que podamos dexar un país vivu, dignu y meyor a los que vengan detrás. Pa que podamos dicir qu'Asturies sigue esistiendo nel futuru.