Somos República, y non solo’l 14 d’abril

1937 Manifestación República XixónUn añu más, cúmplese’l 14 d’abril l’aniversariu de la proclamación de la II República española. Un añu más, Asturies vive delles convocatories republicanes, que van dende la reivindicación de futuru al simple memorialismu historicista. Izquierda Asturiana (IAS), como partíu republicanu que ye dende la so fundación, nun ye indiferente a estes convocatories y encamienta a los sos afiliaos y simpatizantes la participación nes mesmes, pero nun ye convocante de nenguna, non por hostilidá hacia los sos promotores, sinón porque entendemos que la reivindicación republicana nun puede asociase nin única nin preferentemente al 14 d’abril.

Pa nós, el republicanismu ye la defensa d’un modelu basáu na democracia en toles sos vertientes y na visión de la sociedá como comunidá d’iguales. Ye l’apueste pol autogobiernu de los pueblos, tanto a nivel económicu como políticu. Eso esclúi, evidentemente, cualesquier idea monárquica. Reconocemos nes esperiencies históriques de la I y II repúbliques españoles los sos aspectos positivos, pero vemos tamién necesaria la crítica hacia les mesmes nos munchos aspectos negativos que tuvieron pal nuestru pueblu y, fundamentalmente, pensamos que la reivindicación republicana na Asturies del 2015 pasa esencialmente per definir un proyectu pal nuestru país que la materialice.

Somos conscientes de que la celebración del 14 d’abril tien un componente añedíu que ye la reivindicación de la memoria antifascista y la esixencia de xusticia pa les víctimes del franquismu, y nesi sentíu somos solidarios de la mesma. Ye, asina, la impugnación de la llamada transición y les sos renuncies, agora que’l réxime nacíu d’esi pautu amenaza con argayar.

Persabemos que la defensa d’un proyectu republicanu que vaya acullá de la simple efeméride revivalista ye compartida por munchos otros sectores políticos, por suerte cada vez más numberosos. Nesi camín, nel de la construcción d’un proyectu republicanu que nun seya nin calcu nin copia, sinón apueste de futuru pa una Asturies democrática y soberana, vamos topanos. La nuestra república nun ye nenguna de les qu’hebo, sinón la que ta por venir: la República Asturiana. Y por ella hai que lluchar tolos díes, coincidan con una aniversariu o non.

Los comentarios están cerrados.