Asturies pela izquierda

 

no-pedestrians-160700_960_720Izquierda Asturiana (IAS) celebró’l so XIV Alcuentru Nacional el día 14 del mes d’avientu pasáu, onde s’alcordó por unanimidá la concurrencia en coalición con Izquierda Xunida d’Asturies nes elecciones a la Xunta Xeneral del Principáu y a los conceyos que van tener llugar el día 26 de mayu. El nome de la coalición, va ser Asturies pela Izquierda.

Nesi sen y de resultes de los alcuerdos algamaos, IAS participó nes primaries con IX, d’onde resultó vencedora la candidatura encabezada por Ángela Vallina, y na que van integrase los candidatos d’Izquierda Asturiana.

Como primer pasu, redactóse un manifiestu conxuntu que, baxó’l nome de “Asturies pela Izquierda” pue lleese equí:

Manifiestu Asturies pela izquierda

Siguiendo los mesmos alcuerdos, creóse un órganu mistu con tres representantes pela parte d’IX y dos pela parte d’IAS.  El pautu garantiza la presencia de les sigles d’entrambes organizaciones y, amás, dexóse abiertu a la incorporación d’otres fuerces.

Énte la situación d’estrema gravedá social, económica ya identitaria que se traduz nuna sangría demográfica qu’amenaza con convertise nel definitivu Finis Asturiae, IAS fai esti apueste estratéxicu convencida de la necesidá d’un reagrupamientu dende una izquierda ensin complexos y con proyectu de país.

Solo dende la esquierda, dende la meyor tradición de la xente trabayador asturiano se pue tornar un discursu dominante cada vegada más tiñíu d’elementos reaccionarios  y qu’amenacen con llevanos a tiempos escuros.

IAS ye consciente del especial momentu políticu que vivimos y por eso fai un llamáu a xuntar fuerces pol país y pela esquierda.

Pola llucha y la propuesta

Manifiestu d’Izquierda Asturiana énte’l 1u mayu

Un añu más, llega’l 1u de mayu, día internacional de celebración de la identidá colectiva de la clas trabayadora. Un añu más, salimos a la cai a reivindicar les conquistes de los que nos precedieron y que nos tán quitando cola sida de la crisis: acabu de la negociación colectiva, reducciones de xornal, precarización absoluta o recortes nos servicios públicos.

Les agresiones nun son el simple resultáu de tener un gobiernu del PP. Recorta’l PP creando’l marcu llegal de tales agresiones, pero tamién el PSOE aplicando eses ferramientes llegales n’Asturies. Nun hai recortes “progresistes” o recortes “conservadores”, hai agresiones a la clase trabayadora, vengan d’onde vengan.

Y tienen un orixe claru, que ye la voluntá de disciplinar a la clase trabayadora del escenariu post-crisis: una clas ensin derechos reconocíos, ensin ferramientes de llucha y cola precariedá como horizonte vital. Ye l’escenariu de l’austeridá perpetua, de la submisión permanente nel marcu de la UE y el réxime del 78.

L’europeísmu ye’l discursu ideolóxicu que s’impunxo a derecha y esquierda dende los años 80. Ye la xustificación permanente de la naturaleza, polítiques y actuaciones de la Unión Europea. Tolo que viniera d’Europa yera bono. Y d’Europa, p’Asturies, vieno la reconversión brutal del campu y la industria. D’Europa vinieron los pieslles de cientos d’empreses que xeneraron decenes de miles de paraos, y con ello emigración y precariedá. D’Europa vinieron tamién carraos de perres,
xestionaos de forma catastrófica pola casta político-sindical-empresarial autóctona yá que nun valieron pa rexenerar el texíu productivu, sinón pa financiar la rede clientelar cola que fabricar mayoríes electorales, y obres faraóniques fonte de corrupción descomanada, col casu más escandalosu, pero non únicu, del puertu d’El Musel.

La respuesta ye la llucha, y ye la propuesta. De poco val movilizase si nun hai un proyectu alternativu pol que lo facer. Y el proyectu ye’l romper colos marcos de dominación, la UE y el réxime del 78, col envís d’armar un proyectu constituyente onde’l pueblu asturianu seya l’únicu amu del so futuru. Y el métodu ye’l combate unitariu de tolos sectores en llucha, de tolos que pierden cola crisis global del sistema y del réxime. Vímoslo na manifestación de va mes y mediu de les empreses en llucha equí en Xixón, y vímoslo tamién nes marches de la Dignidá del 22M. Nel añu del 80 aniversariu de la revolución asturiana, tenemos un exemplu claru de lo que ye quien a facer esti pueblu cuando ta uníu y consciente de la so fuercia.

El 1u mayu y el restu del añu, Fuercia y Unidá hasta la victoria.

Izquierda Asturiana (IAS)

¡Nin súbditos nin alteces: Somos República!

Manifiestu Somos RepúblicaXuan Carlos I d’España y daqué d’Alemaña (por Corinna, Julia Steinbush y la Merkel) cai. Y esta vegada nun ye un tropezón por fuxir de llechu impropiu colos calzones d’armiñu al costazu, nin por cazar elefantes en Botsuana, nin osos borrachos nos Cárpatos. Xuan Carlos I ta cayendo de podre y la oligarquía española castiza y casposa cuenta col so recambiu en Felipe VI. La operación empecipió: trátase de sustituyir al vieyu y escadriláu Borbón, que s’azotó a pola corona saltando perriba’l cadabre del so hermanu y el derechu dinásticu del padre, por un rei nuevu que pase la ITV (Inspección Técnica de Vagos) con un recauchutáu que tape la corrupción y el trinque de la familia real al completo. Vuelve a tratase de dexalo too “atao y bien atao” como bien dixera -y meyor fixera- el so mentor: el dictador Francisco Franco. Resulta chocante qu’a esti proyectu lu llamen “Segunda Transición”, idega llanzá hai meses que ta siendo “trendingtopics” y que ta prestando pola vida a les clases dominantes y sobre la que caún fai la so quiniela.

Sabemos que los rexímenes políticos tán al serviciu de los sistemes económicos. La restauración de la monarquía borbónica del 78 foi la forma d’Estáu de la que se dotó’l gran capital pa defender los sos intereses y planes d’acumulación. Agora la so continuidá en Felipe VI rubricaría l’Estáu nuevu de l’Austeridá y la Probeza que foi imponiéndonos los distintos gobiernos del réximen (asina del PP como del PSOE, como de CIU o el PNV, etc…), al dictáu de la Troika y del gran capital financieru trasnacional que ta esmantelando toles conquistes históriques del movimientu obreru, el feminismu, l’ecoloxismu y los movimientos civiles democráticos.

A los sectores populares nun nos queda otra que contraponer a los sos planes, la ROTURA col Réxime del 78 y los sos continuadores, exerciendo la SOBERANÍA POPULAR y col exerciciu efectivu del derechu a l’autodeterminación de los Pueblos del Estáu español, p’abrir el procesu o procesos constituyentes necesarios que conviertan en realidá les aspiraciones republicanes de los y les trabayadores.