Un 1u mayu o un añu enteru de movilización social

Volvemos a salir a la cai nesti día internacional de la clase trabayadora, ritualizáu y oficializáu cuantayá como forma de desactivar el so componente de llucha. Lo que nació en 1890 como una fecha internacional de fuelga xeneral pola xornada de 8 hores ye agora un conxuntu de procesiones que, en dellos casos, nun tienen el menor componente reivindicativu. Nun ye’l casu de la manifestación qu’entamen tolos años en Xixón los
sindicatos CSI, SUATEA y CGT, a la que se suma leger-constructores19501esti añu la CNT, y que’l nuestru partíu, Izquierda Asturiana (IAS), lleva sofitando dende’l so nacimientu

Salimos esti añu a la cai nel contestu d’aparente estabilización de la crisis del capital. Disciplinada la clase trabayadora col despidu prácticamente llibre, emprobecida cola mengua de xornales, precarizada cola temporalidá de los contratos, amedranada cola Llei Mordaza, la oligarquía recupera la estabilidá macroeconómica a costa de la clase trabayadora, trabayadores autónomos y demás sectores populares. La fin de la crisis ye esto: trabayar por xornales miserables que nun dan pa llegar a fin de mes y dar les gracies por nun tar na cola’l paru, teniendo como horizonte vital la precariedá. N’Asturies, vese esto de forma más dramática yá que la nuestra mocedá nun atopa nel so país nin siquiera esos trabayos ruinos, teniendo que colar como lo lleva faciendo hai trenta años. Asturies ye la comunidá autónoma con menos mocedá de tol Reinu d’España, añadiendo a les eternes crisis asturianes (económica, social, cultural…) l’agravamientu d’otra que vien de mui p’atrás: la demográfica.

Esti nun ye l’únicu resultáu posible. Ente 2012 y 2014 vivimos un ciclu de movilizaciones sociales como nun se vía dende munchu tiempu. El cumal d’esti ciclu fueron les Marches de la Dignidá del 22-M, que fixeron rescamplar que la crisis económica yéralo tamién del réxime restauracionista de 1978. Pero les cais quedaron vacies cuando l’enfotu pasó al tarrén electoral. Nesti ciclu d’elecciones 2014-2016 hubo avances abondos de les fuercies d’esquierda, pero metese nes instituciones al preciu de vaciar les places nun val pa cambiar les coses. Cais vacies nun valten réximes. Namás la movilización popular alredol d’un programa políticu claru, de rotura democrática, de procesu constituyente, que ponga en cuestión TOLOS marcos onde ta ensertu’l pueblu asturianu y tolos demás del Estáu, dende’l propiu Reinu d’España a la UE o los amenazantes trataos comerciales tresatlánticos, pue ufrir una salida a esta espiral de precariedá, probitú, corrupción, comederu y reacción.

Nun se cambien les coses solo con sorrises. Nun se cambien les coses diciéndo-y a la xente que ye posible facelo ensin tocar los marcos de dominación. Nun se cambien les coses prometiendo a la xente que vamos ser clase media, porque nun somos clase media, nin baxa, nin alta: les clases sociales nun son una cuestión d’estatura, sinón de propiedá, de propiedá de les fontes de riqueza, y la gran mayoría de los asturianos y asturianes somos trabayadores, clase trabayadora, descendientes de la mesma xente que punxo Asturies nel mapa del mundu cola so llucha y el so exemplu.

Nel añu del centenariu de la primer vez que la clase trabayadora garraba’l poder nun país, bono ye celebrar la nuestra identidá como clase, pero especialmente trazar el camín que mos lleve a la lliberación.

IZQUIERDA ASTURIANA (IAS)

Los comentarios están cerrados.