Un derechu civil inalienable #ConTolesLletres

Día Lletres Asturianes 2015Dende Izquierda Asturiana (IAS) llamamos a la participación esti vienres 8 de mayu, igual que n’años anteriores y mentanto seya necesario, na manifestación que, entamada pola Xunta pola Defensa de la Llingua Asturiana y coincidente col Día de les Lletres Asturianes, percorrerá les cais d’Uviéu pidiendo la oficialidá del asturianu y del gallego-asturiano.

Ye esti un actu más, necesariu y fundamental, nun día simbólicu y señaláu, dientro de la reivindicación de los derechos civiles de los falantes, actuales y futuros, de la ciudadanía asturiana nel so conxuntu; ún de los munchos que se faen y que sirven pa recordar a los que tienen la responsabilidá política de garantizalos, que siguimos equí añu tres añu y vamos siguir tando mientres ellos nun actúen con xusticia. La manifestación pola oficialidá del idioma asturianu nun ye nin debe ser una procesión ritual: Ye un actu d’afirmación ciudadana, de compromisu cola identidá, de llealtá y que manifiesta voluntá de futuru pa cola llingua. La oficialidá ye una cuestión que nin tien nin ha de sometese a xuegos electorales, o referendums. Esta (co)oficialidá nun pue depender de los votos y les estratexes, de les falses voluntaes y falcatrúes del momentu electoral presente. Los derechos civiles tiénense y deféndense y si l’alministración, si’l poder los ñega, esíxense y conquístense. Tampoco nun puede ser una carta intercambiable nuna baraxa d’intereses ayenos a los asturianos y asturianes, que simplemente piden la ferramienta que-yos valga pa ser los amos del destín de la so llingua. Un derechu civil inalienable. Eso ye lo que tamos pidiendo. Ye bien fácil d’entender y tendría de ser igual de fácil d’esplicar.

Y si aneciamos na oficialidá, con toles lletres y ensin prefixos, subordinaciones sintáctiques qu’al final son semántiques o xuegos malabares, ye porque, güei, la única forma posible de garantizar estos derechos pasa pel estatus y reconocencia llegal asina afitada -pues ye la única manera posible- nel marcu xurídicu y llegal actual del Estáu español.

Sicasí, la oficialidá nun ye una meta, un fin en sigo mesmo, sinón un oxetivu mínimu que val de suelu, de soporte mínimu per baxo, a la normalización social de la llingua asturiana y del gallego-asturiano, ye un primer pasu necesariu nel camín de facer normal lo que cuantayá habría selo.

Los comentarios están cerrados.