Un ventanu a la duda

An art installation, part of the "Balconies, Life, Art, Pandemic, and Proximity" exhibition is seen in Berlin on April 12, 2020, amid a new coronavirus COVID-19 pandemic. - Over 30 artists are taking part in the two-day exhibition which calls on "the artistic community living in [Berlin's district of] Prenzlauer Berg to activate / exhibit / inhabit / their windows and balconies on Easter Sunday and Monday". Curated by Ovul Durmusoglu and Joanna Warsza, the exhibition boasts "zero budget, no openings, no crowds, just a proposition of a stroll that would connect dots in solidarity and togetherness". (Photo by John MACDOUGALL / AFP)

Tiempu pa dudar y tiempu pa deprender. Dellos pensadores d’esquierda y filósofos internacionales asoleyaron yá enantes d’acabar el mes de marzu una compilación de les cuestiones màs ingrientes derivaes de la pandemia y cuarentena mundiales que lleven inevitablemente a la conclusión de que tamos nun puntu de ruptura, nun momentum dende’l que nada va volver a ser igual y va trayer consecuencies na organización social y na necesidá de repensar el sistema económicu mundial. Una esbilla de llectura obligada, baxo’l títulu de Sopa de Wuhan pue descargase debaldre calcando nesti link.

Hailu que ve’l principiu del fin del Capitalismu, como si les causes estructurales y les condiciones oxetives se precipitaren d’esmenu nuna fola repentina que va acurtiar los tiempos y los procesos, otra manera necesariamente llargos y complexos. Hailu qu’avisa de la llegada, esta vegada ensin careta, d’un nuevu orde autoritariu y un retrocesu de les llibertaes individuales que dexaría intactos y preservaría los mecanismos d’esplotación condenando cualquier pensamientu disidente. Hailu tamién, que fai un llamáu a la subversión y la reorganización p’aprovechar les contradicciones d’un sistema qu’argaya y al que se-y tán viendo les costures arreventando.

Pelo que toca al nuestru país, Asturies, ye ceo p’albidrar les consecuencies que dende’l puntu de vista humanu y económicu va tener esti «para y arranca» social, pero nun quita pa, polo menos, abrir la ventana y dar avisu de les contradicciones más llamatives que rescamplen, más que bona parte d’éstes sian cambiantes y pasaxeres por demás. El contestu del Estáu ta nuna cruciada dialéctica onde les retóriques polítiques intenten a diario marcar el pasu a les idees pa deleite de les respectives parroquies, reducíes agora más que nunca al papel d’espectadores.

Les midíes necesariamente esceicionales implantaes polos responsables políticos queden xustificaes pol contestu esceicional y eso prende les alarmes de les cabeces más setoses y desconfiaes del mundu pensante, a derecha y a esquierda, receloses de qu’esti nuevu orde, necesariu, quede afitáu yá por si acasu y pa siempres.

Pero nun dexa de ser una propuesta hipócrita, retruquen otros, menos celosos d’una privacidá y llibertá que persaben ficticia y en manes de les corporaciones que rixen el destín de lo que llamaben hasta va poco, non ensin cierta maldá, el «Mundu Llibre», esi que con tanta neciura nos dedicamos a esportar a los probes desgraciaos de los otros mundos a más gloria de les ganancies que nos permitan siguir col nuestru estilu de vida. Porque no que tán d’alcuerdu unos y otros ye que lo que se ta xugando o polo menos cuestionando ye l’estilu de vida. Y cuando apeligra la certeza de lo más
inmediato y se tien la impresión de que nengún ta a salvu, nun hai tiempu p’artificios, polo qu’ún de los efectos más aprehensibles d’esta situación ye la cayida de caretes, antifaces, trampes y mitos a una velocidá descomanada.

Asina, siguiendo esta lóxica, hai argumentu pa toles esplicaciones a gustu de cada club de fans:

– El preciu de la llibertá.
Ye cierto qu’hai países más efectivos a la hora de curiar la vida y la salú de los sos ciudadanos, pero claro, son rexímenes totalitarios. Y yá se sabe que nes dictadures onde ún ta suxetu al Güeyu permanente del Gran Hermanu y l’orde social ta rixíu polo militar, el pensamientu únicu ye eficaz pa dalgunes coses. Cómo si’l preciu qu’hubiera que pagar polos derechos y llibertaes y la preservación de la esfera privada hubiera que lu escribir en sangre humano. Cómo si nun lleváremos entregando la nuestra intimidá voluntariamente a les empreses privaes a cambiu d’unos cupones de descuentu y una cebadera diaria del ego nes redes sociales. Como si les enseñances que munchos tán dando a les xeneraciones más moces nun fueren les de la esposición impúdica y la santificación del «ser famosu».

– La busca del culpable
Una de les primeres consecuencies, quiciás inevitablemente humana, ye buscar culpables y por eso les más variopintes teoríes conspiratives alcuentren la tierra cuchao d’una forma nunca vista dende tiempos escuros. Gracies a los grandes ríos d’información colos que vivimos, que la duración y la propia bayura d’argumentarios quiten gravedá y faen caducables y refutables la mayoría d’esos folleros mentales, calteniendo a salvu la cabeza de la xente.

Pero eso nun quita pa que se repitan axiomes clásicos, como’l de la culpabilidá del otru, el diferente, el raru, el salvaxe, el non civilizáu. Siempre hai un otru del que echar mano, igual que la culpa siempre yera del que vivía fuera del orde: les bruxes, los xudíos, los musulmanes, los hippies que nun se llaven, los non cristianos… los chinos que comen esperteyos crudos aparte de dominar el mundu na solombra. Hai igualmente, argumentos p’aburrir y escoyer dende la otra banda, dende’l castigu divín en toles variantes divines imaxinables hasta la venganza de la Madre Natura pa los que prefieren la sacralidá ecolóxica y teleolóxica de lo mundano a lo sagrao eclesiástico.

-La economía nun yera lo que mos dicíen que yera o la non univocidá de les cifres.
El per otra parte omnipresente debate económicu sustánciase na dicotomía ente preservar la vida y la salú o preservar el texíu económicu. Atopar l’equilibriu ente uno y lo otro ye xera pa toos y caún de los gobiernos, pero al mesmu tiempu, como en toa crisis del sistema, los críticos, los que nun tomen o tomamos decisiones cuerren el riesgu d’escindise en tantes soluciones que faen la respuesta inoperante o directamente inexistente. Asina, ye un deber plantegase yá non si ye’l momentu d’implantar una renta básica sinon si eso ye una solución pa contiar al sistema o ye una pura necesidá existencial. ¿Ye una necesidá coyuntural o estructural? ¿Ye d’esquierdes o de dereches? ¿Ye moral o inmoral? y sobre too dicir qué tipu de renta básica non solo necesitamos sinon cuála ye la que queremos.

Otra pantalla que cai ye na que veníamos xugando dende los años 90, onde los economistes lliberales anunciaron el fin de la historia y proclamaron al mercáu como únicu dios verdaderu. ¿Cómo ye que los mercaos financieros nun s’esboroñen a midida que crez el paru por millones y mengua l’actividá empresarial? o veniendo a lo mas apegao a nosotros ¿Cómo pue subir la bolsa el día que s’anuncia el colapsu del sistema sanitariu y piesllen miles de comercios, cientos de miles d’autónomos queden ensin ingresos y hai un desfase presupuestariu que pue tener consecuencies pa décades futures? Pero ¿Nun dicíen que si la economía diba bien, los indicadores macroeconómicos yeren bonos y la balanza comercial esto y lo otro… eso traducíase en que toos vivíamos meyor? ¿Cómo ye posible que viviendo peor, toes eses macrocifres nun se desplomen un día sí y l’otru más?

Nun ye fácil llabor pensar en llargo y dar soluciones en curtio per parte del que tien la responsabilidá de pensar na salú en primera instancia y persabe que’l sistema sanitariu ye parte tamién del sistema económicu que nun se pue dexar fundir. El problema real equí ye que sí, ye verdá, esto pue fundir ¿Dexámoslo fundir pa refacelo? ¿Tamos dispuestos a pagar el preciu individual pa construyir un mundu meyor? ¿Somos cobardes por ello? y sobre too ¿Pue nadase y guardar la ropa, preservar lo necesario y reorientalo?.

– Europa nun yera eso.
Crisis per partida doble de los «europeístes», o defensores a ultranza de les bondaes de la pertenencia a esta Unión Europea, una postura prácticamente monolítica y tresversal a cuasi tol espectru políticu español (con honroses escepciones). Ye en momentos de crisis internacionales cuando un supuestu ente políticu tien que compartir análisis pa falar cola mesma voz, a lo menos no básico. Perdíes les esperances na capacidá d’articular una axenda de derechos y deberes comunes no social, tovía pensaben dellos que, como espaciu económicu polo menos, diba comportase de manera eficaz pal conxuntu de los integrantes, pero paez que los que dirixen la nave europea prefieren amputar lo que seya menester enantes d’arriesgase a siguir metiendo monedes nos territorios más dañaos. Somos como una máquina tragaperres que ya dio’l premiu.

– La planificación ye superior científicamente.
Hai quien ta anticipando’l deséu, confundíu con una realidá mui coyuntural sobre’l papel de los estaos, llargamente denostáu y recortáu por decenios de polítiques neolliberales qu’esfelpeyaron la so capacidá d’asistencia. Agora la asistencia traduzse en capacidá de respuesta. Ye evidente’l resultáu positivu qu’alquieren les polítiques qu’emanen de los estaos más planificaos y diversificaos no productivo énte los que son simples consumidores de mercancía y dependientes de la economía especulativa. Pero eso nun quier dicir que se vaya a traducir nuna enmienda a la dinámica hiperglobalizadora. Lo más probable apunta a que los estaos más capaces establecerán determinaes regles del xuegu que-yos garanticen reserves estratéxiques en casu d’eventualidaes d’esta mena, en detrimentu de los que nun tengan la capacidá o la fuerza económica y estratéxica pa facelo.

– El virus sí entiende de territorios.
Porque igual qu’unos tán pagando en mayor midida qu’otros la factura del movimientu privatizador de los servicios sociales, les condiciones poblacionales, climátiques, xeográfiques y culturales nun son tampoco les mesmes. La descentralización ye siempre una virtú siempre qu’heba coordinación. Tapecese col mantra del «mandu únicu», nel casu concretu del gobiernu Español pue ser oportuno sociolóxicamente pa esclariar les dudes que un sector grande de la ciudadanía tien sobre la naturaleza d’un gobiernu «rojo-separatista» o pa recuperar mecanismos de control que va tiempu que’l centralismu abandonó. La retórica militar tien qu’entendese precísamente equí. La guerra tien munchos frentes y centralizar la loxística y les respuestes necesaries demostróse un exerciciu de torpeza y un cantu a la galería cuartelaria y a los valores más rancios y reaccionarios. La «Autoridá Competente» conviértese asina n’incompetente por desconocencia de les realidaes territoriales.

Baxando a lo concreto, les competencies sanitaries cuantayá tán trespasaes a les comunidaes, que trabayen con unos parámetros y homologaciones estatales ya internacionales. Resucitar un MInisteriu de Sanidá zombi y pretender nuna situación d’emerxencia, na que’l tiempu ye vital, controlar les compres, la distribución de materiales o determinar les midíes a tomar en cuanto a restricción de movimientos o actividá económica ye abonase al riesgu del too o nada ensin posibilidá d’escapatoria.

Valga d’exemplu la rellación d’establecimientos hoteleros p’abellugu de sanitarios que mandó Madrid al Gobiernu d’Asturies, onde la mayoría ya nun existíen, cuando lo fácil ye pidir a cada comunidá que faga’l so trabayu. Naide meyor que cada sistema sabe les sos carencies y fortaleces.

Argumentóse por parte de les autoridaes polítiques que’l pesu del Estáu yera fundamental pa dir al feroz mercáu de lladrones y apostóse por asegurar llinies de producción cuando ya taba la rula funcionando dende diba tiempu. Esta estratexa fracasó estrepitósamente, a pesar de los esfuerzos por maquillala y el tiempu perdíu sigue pasando factura.

En tou casu, esta tensión ente centralismu y descentralización nes respuestes que se ta dando en munchos sitios, con resultaos diversos nun ye esclusiva de los estaos federales, onde rescamplen la eficacia con diversidá de paeceres ente los Lander y el Gobiernu Federal Alemán o nos EE.UU. coles aspiraciones totalitaries de l’Alministración Trump, sinon que la decisión d’acutar o actuar de manera concreta en determinaos territorios ye una constante dende l’españíu de la pandemia, dende China a Italia, polo que la retórica centralista española ye más incomprensible tovía.

Asturies pinta mui poco, pero naide mos pue dar lllecciones de solidaridá y xusto ye reconocer la capacidá que tovía tienen los nuestros servicios públicos al llau de los d’otros territorios más lliberales y «prósperos».

Nun ye que’l virus entienda de territorios, ye que los encargaos de la xestión sanitaria tienen qu’actuar territorialmente, poniendo los recursos propios al serviciu de los sos alministraos, con coordinación, pero ensin esperar que venga l’elefante blancu a partir la tarta. La sospecha de que se primaron intereses territoriales concretos y s’actuó mal y tarde pola mor del pesu políticu centralista ye inevitable.

– La Verdá Única.
Nun hai que confundir la intoxicación y el desenmazcaramientu de la propaganda partidista col derechu a la llibertá d’espresión. Ye verdá que la retórica bélica na qu’España foi de les primeres en revistise autoriza al control de la información y a la eliminación de la discrepancia. La lóxica sería esta: Tamos en guerra, poro saco a los militares de los cuarteles a les cais, cosa que siempre asusta muncho, anque nun echen multes. Darréu d’ello, el qu’esparde rumores ye un traidor oxetivu y equí solo val lo que diga yo, que soi’l que manexo la verdá. De fechu, ya se sabe cuála ye la primer víctima de cualquier guerra.

Y ¿D´onde remanez esa verdá incontestable? Agora que nun hai divinidá qu’otorgue poder omnímodu, tenemos la Ciencia. Esto nun lo digo yo, diz el presidente «Dícennoslo los científicos». «Oiga, que nun se pue confinar tal pueblu». «Oiga, qu’España tien les midíes más restrictives posibles, yá nun se pueden poner más dures»; «Bueno mire, que voi poneles más dures.. «; «Voi llevantar un poco la mano» -Pero… «A callar. Mandólo la Ciencia».

Pídenmos fé inquebrantable nes decisiones que se tomen, como si éstes nun foren decisiones polítiques que tomen políticos, sinon decisiones «dictaes pola neutralidá de la ciencia» y que busquen el bien común. Nesti Delfos onde toos pagamos un preciu, el problema nun ye que creyamos na diosa ciencia, lo malo ye creyer na infalibilidá del sacerdote que nos interpreta les incomprensibles palabres de la pitonisa.

El control de la información exercíase nel Franquismu col NO-DO, la censura y el parte de Radio Nacional. Nuna democracia parlamentaria n’estáu d’alarma les coses tienen que ser más sutiles. 15 millones pa les dos corporaciones que controles el 80% de les emisiones radiotelevisives nun ye ciertamente una manera dictatorial de facer les coses, por muncho que salga l’estamentu militar tolos díes en pantalla o fregue les cais con lixía.

– Unos paguen más que los otros.
Y anque por desgracia nun teamos falando solo de dineru, d’economía, pue ser que’l gobiernu Sánchez tea más al serviciu de la oligarquía que de la mayoría. Al revés de gobiernos como’l portugués y l’italianu, falten midíes valientes, como suspender alquileres y el pagu de servicios básicos, o esixir el retornu del rescate bancariu como fixo Portugal. Esti executivu foi’l primeru n’estremase d’Italia, que pidía una salida más social d’esta crisis. ¿Por qué nun se pon impuestos a los padremuños superiores a mediu millón d’euros? ¿Por qué nun se contempla que la banca devuelva los 60.000 millones que-yos regalaron? ¿Por qué se caltién tol gastu militar? Si se gravara a les Sicav con namás el 5% atropábense 1.500 millones de euros dicen les cuentes de dalgún qu’acompaña a Sánchez. Ensin embargu anéciase na forma que los trabayadores tenemos que devolver les hores que tuviemos en casa ensin trabayar.

– Mal de munchos.
Que dende’l Gobiernu central se tán cometiendo errores de xestión bultables, ye innegable. Anunciar solemnemente que dientro de dos díes se va decretar un confinamientu o qu’en pasando tal fiesta se va endurecer, ye como anunciar que pasao mañana vas facer un exame sorpresa. Que se ta xugando un papel claudicante frente a Europa, tamién. Que tán actuando d’una manera feble no social, evidente, como tamién lo ye que se ta asumiendo una retórica populista peligrosa y reforzando’l discursu españolista. Ello nun quita pa reconocer la situación de precariedá na que s’alcuentra, arrodiáu por unes fuerces reaccionaries que mos abonaríen a muncha más desigualdá, probeza y falta de llibertaes y a les que nun se-yos pue dar nenguna baza.

Pero d’ehí hai un cachu a apuntase a la partida dialéctica del «y tu más» a ver quién cometió los mayores fallos o quien ye más sinvergüenza a la hora de saltar la cuarentena pol fechu de ser más facha o quién desmanteló meyor el sistema sanitariu públicu. Tampoco ye consuelu la comparanza con otros estaos que tán actuando igual de mal.

Ye lo que tien la globalización informativa. Siempres va haber comparances a gustu de toles opiniones y estadístiques que xustifiquen lo que faiga falta.

– El control del individuu.
Volvemos a como entamemos. L’alarma ente bona parte de la intelectualidá a la que mos referimos a lo primero ta puesta nos mecanismos de control social que se desplieguen cola sida de preservar la vida nesta situación. Ye verdá que podemos ceder temporalmente y con gustu parte de la nuestra intimidá o privacidá a cambiu de que se mos garantice la salú, pero tamién ye cierto qu’hai otres maneres de facelo.

Pue incluso aceptase una retórica bélica garantizando que nun vamos convertinos pa siempres n’oveyes numberaes al serviciu de gobiernos y n’última instancia corporaciones. Anque sigamos viviendo ente la insignificancia y la duda, un mínimu de dignidá da-y sentíu a les lluches y a la esperanza, más allá de vivir desnúos n’ares d’una cacarexada UNIDÁ, que la xente trabayador interpretamos pue ser que d’una manera que nun tien que ser xustamente la que mos proponen.

Los comentarios están cerrados.