Comentarios sobre l'actualid· d'Asturies y del mundu por persones venceyaes a Izquierda Asturiana (IAS) http://www.ias.as Los comentarios nun representen necesariamente los posicionamientos del partÌu sinon de les persones que los escriben. M·ndanos los tos comentarios o aportaciones a contacta@ias.as

 
Muyeres de Mieres, muyeres que cuenten

Nesti mundu grisón que nos toca vivir, onde'l trabayu, la televisión y los fines de selmana en grandes superficies son lo más avezao pal común de los asturianos y asturianes, y onde la mediocridá y l'individualismu acríticu y ramplón van de la mano, rescampla la presencia de persones que son a enfrentase a esti ermu sociolóxicu. Nún tiempu nel que'l vieyu conceptu marxista d'alienación tá recibiendo bien de crítiques (unes más acertaes y otres menos) llama l'atención, como decíemos, ver a xente cola fuerza pa nun parar... pa nun parar de facer coses, de crear y de trabayar pa la "comunidá". Nes últimes feches el qu'esto escribe tuvo'l fondu placer de conocer a una muyer d'eses que dexen güelga. Mª Luisa Álvarez Llorente , Luisina, publicó va un par d'años un llibru con un títulu abondo esplicativu: "Tenía que contarlo" cola Fundación Juan Muñiz Zapico. Esta muyer de setenta y munchos años vivío dellos de los episodios históricos más heroicos, pero tamién más tráxicos del nuestru país. A Luisina tocó-y la revolución d'ochobre del 34 con nueve añinos de nada, darréu vieno la guerra y la represión. Arriendes d'ello esta muyer quedó güerfana ya de bien pequeña. A Luisina como a otres tantes muyeres y paisanos de la so dómina tocó-yos vivir l'oscurantismu y la mediocridá d'esa posguerra onde'l facismu machacó families enteres (especialmente nes Cuenques).
Con too y con ello, ésta muyer foi, años más tarde, una de les impulsores (xunto col home -Quiroga-) de l'Asociación Amigos de Mieres -"una lluz al otru llau del túnel" en palabres d'ella-. Corríen ya los caberos años 60. D'ehí p'alantre nun se-y puso nada per delantre. Col franquismu tovía vivu el trabayu foi imparable... actividaes culturales, llucha polos derechos de los pensionistes, movimientu vecinal, Asociación d'ames de casa.... pero tamién represión, estaos d'escepción, necesidaes... Momentos bonos y malos pa una muyer exemplar que como me dicía l'otru día: "Volvía a facelo too otra vez, nun me arrepiento de nada".
Diz l'historiador Rubén Vega na presentación de llibru que Luisina Quiroga úfrenos "en primera persona el testimonio de una vida marcada por un tiempo histórico preñado de adversidades y a la que da sentido un compromiso con los problemas de los demás asumido sin reservas". Ensin reparos y ... ¡¡Con Remangu!!.
Una muyer capaz de vender a un guardia un "Mundo Obrero" en plena comisaría o, nún alcuentru col Gobernador Civil retrucar a:
- Yo sé que usted sale de su asociación con las banderas del 1º de mayo.
Con:
- Tien usté malos informadores señor Anguera, de l'Asociación salen pancartes, banderes ni una.
En fin un llibrín mui prestosu escritu por una muyer con muncho que contar a los y les que venimos entrás a veces dexando la nuestra historia (la historia de los nuestros) nel escaezu.

Y p'acabar otra recomendación... "Tras las huellas de El segundo sexo en el pensamiento feminista contemporáneo" de Susana Carro Fernández. Una defensa de la vixencia de la obra de Simone de Beauvoir, posiblemente'l llibru más influyente nel pensamientu feminista, frente a les corrientes más posmodernes actuales y frente al feminismu de la diferencia que se desmarcaben del pensamientu de Simone de Beauvoir -en palabres de la so autora en Les Noticies- . A la fin, dos llibros de dos xeneraciones de muyeres mierenses con coses (interesantes) que cuntar.
Unviao por El a les 3:38 AM

 
CONCIERTU POLA OFICIALIDÁ
El conciertu pola oficialidá que dende va casi dos décades entama la Xunta pola Defensa de la Llingua Asturiana - Xunta Moza vuelve a Uviéu, el día 26 d'abril nel Campus de Santuyano (Humanidaes) n'Uviéu.
Los grupos qu'esti añu van tar presentes son: Lliberdón, Felpeyu, Dixebra, Güerku, Oi! N’Ast y Dr. Xicu. Entamarán a tocar a partir de les 19'00 hores.
Más información na web de la Xunta

Unviao por sacabera a les 12:48 AM

 
KURDISTAN Munchu tiempu ensin escribir ¿Nun s'anima naide? ¿y de qué puedo falar? Bueno quiciabes ye daqué obsesivo pa dellos nacionalistes pero nun podemos dexar d tar ente fascinaos, almiraos y impresionaos polos kurdos y el Kurdistan.
Nesti weblog ya se punxo daqué de los kurdos, yera Akakurdistan, una web impresionante que pa min ye una de les meyores de les que se pueden atopar na rede y que nun canso de mirar.
Agora voi recomendar otra, menos vistosa pero na que vos encamiento mirar sobremanera la sección de mapes onde podemos alcontrar información sobre les fuercies kurdes dominantes en tol territoriu, les revueltes a lo llargo d'una historia de represión y llucha, y milenta coses más. Ye'l Kurdish Worldwide Resources, nel que podéis atopar información perinteresante.

Unviao por sacabera a les 7:45 PM

 
PONIENDO...LOS VERDES
Dizque poner la etiqueta de lo verde nun nome electoral ye un carambelu que cualquier proyectu alternativu, o asina, nun refuga si se pon a tiru. Y esti tema de lo verde lleva años dando muncho que falar nel estáu español, en parte polo que dicimos y en parte pola propia incapacidá de les alternatives polítiques que reclamen ser lexitimamente verdes p'algamar una representación institucional, lo que da llugar a que delles fuercies traten de sacar tayada electoral.
¿Quién nun s'alcuerda del famosu episodiu d'aquello "verdes ecologistas" que montara una presunta secta? Pues agora tenemos un episodiu autóctonu; l'anunciada coalición ente'l PAS y Los Verdes Asturianos.
Nesti weblog sí que podemos confirmar de fontes fiables dafechu que'l so representante (Isidro Molina o "Isidro'l del PAS") ye militante del PAS, que la sé d'estos verdes asturianos ye la mesma que la del PAS y que yá nel añu 95 esti partíu, que tien de nome oficial Los Verdes Asturianos-Partido Ecologista Asturiano, pidiera'l votu pal partíu asturianista nuna rueda de prensa, que tamién dio una militante del PAS.

Unviao por sacabera a les 11:35 PM