Comentarios sobre l'actualid· d'Asturies y del mundu por persones venceyaes a Izquierda Asturiana (IAS) http://www.ias.as Los comentarios nun representen necesariamente los posicionamientos del partÌu sinon de les persones que los escriben. M·ndanos los tos comentarios o aportaciones a contacta@ias.as

 
MATRIX Y LOS OTROS...
Daquién me comentó esta selmana, (y perdón pola insistencia nos temes llingüísticos que tien la sacabera nesti weblog, conozse que mos lo da la especie) que la situación de la llingua asturiana podía, pasu ente pasu dir asemeyándose a la de los humanos en Matrix.
Y ello axúntolo con otru comentariu que me fixo daquién sobre la situación de la llingua asturiana nun llugar del conceyu de Tinéu, llugar au inda nun aportó la sensibilidá asturianista nin los grandes avances de los caberos años. Ellí l'asturianu ye una llingua viva dafechu pero clandestina. Los falantes nun dexen que se-yos conoza la llingua que falen delantre de foriatos y yá nun la tresmiten, anque la conocen y siguen usándola ente ellos.
Esa ye la realidá de los miles de persones de les zones rurales que caltienen viva la llingua de verdá, pa los que la llingua ye, anque-yos de apuru, la llingua de comunicación de la so comunidá, del so mundu.
Al otru llau del espeyu tenemos el mundu "de la llingua" que de xuru que ta algamando abondos esitos lliterarios y reconocencia social, qu'entama a dar
Dicíame la persona de la que falo, qu'una forma de matar la cultura asturiana yera caltenela en guetos a los que se-yos insufla medios económicos (probes, mui probes) que s'alimenten a ellos mesmos yque valen pa caltener el espeyismu de la supervivencia, de la ilusión d'un mundu nel que l'asturianu ye normal pero que nun tien nada que ver cola mísere esistencia y el míseru futuru que nos espera.
Una llingua nun esiste, nun ye nada, si se convierte -únicamente- nuna ferramienta de trabayu a tiempu completu o parcial. Nun ye nada si nun ye l'instrumentu de comunicación d'una comunidá que pue vivir, arguyosa y consciente, les 24 hores del día nesi idioma.
Otra manera, como dixo dacuando Rato de Zapatero, quiciabes más que como los personaxes de Matrix vamos a acabar siendo como "Los Otros" d'Amenabar. Esos muertos que piensen que tán vivos.

Unviao por sacabera a les 9:24 PM

 
Vamos dar el pasu que de xuro por modestia nun quier dar nesti weblog un militante d'IAS. Trátase Carlos Suari, militante del asturianismu políticu (ehí ye na), al que va poco espublizaron un trabayu d'él nuna revista arxentina llamada "Lecturas de Educación Física y Deportes". . Nel artículu Carlos cuéntanos como podría dir incluyéndose los deportes tradicionales nel currículu de la educación física de secundaria. Como suel ser norma nesti país, esta ye una faceta más de la cultura asturiana escaecida, que quedó arrequexada y a la que hai qu'armar de dignidá y modernidá p'asegurar el so futuru. L'artículu amás ta n'asturianu y pue llese nesta dirección.
Unviao por Recochinos a les 2:01 PM

 
ROPA LLIMPIO

Qué fácil ye nestos díes falar de tola ropa puerco que desfila pel panorama políticu d'Asturies, y de les sos farrapes, y tal y cual, etc., etc., etc.

Esta presentación nun dexa de ser un xuegu pa nun perder ocasión de saludar a los de siempres... pero güei vamos falar de coses más productibles, como la campaña Ropa Llimpio.
"En 1989, una manifestación énte unos grandes almacenes n'Holanda pa denunciar les llamentables condiciones llaborales esistentes en Filipines (au se facía la ropa) creció hasta convertise nuna campaña llamada Campaña Ropa Llimpio (CRL). La campaña, centrábase na meyora de les condiciones llaborales nel sector testil y de material deportivo mundial, agora ta activa notros 11 estaos europeos."

Asina foi como xurdió esta campaña qu'anguaño tien presencia en tol estáu y que llucha pola dignidá de los trabayadores del sector testil de tol mundu, n'especial, los del mal-llamáu 3er mundu. Nike, Adidas, Adolfo Domínguez, son namás trés marques de toles qu'incumplen unos mínimos morales na producción de ropa. Saber qué mercamos, aú lo mercamos y por qué lo mercamos, pueque seya más cenciello depués de visitar ropalimpia.org


Unviao por Lluz a les 1:13 AM

 
HABRÁ QUE CHUMASE Y/ O LLAMALOS POL SO NOME
Lo d'esti país entama a ser de charanga y pandereta (ta claro que lo de gaita y tambor yá ta malo d'aplicar, anque seya negativamente, a Asturies).
Agora los "fisnos" del Conseyu regulador de la sidra amuésennos la so ambiciosa campaña de promoción de la sidre asturiano y la so curiada imaxe coorporativa.
Sí, sí nun lo sabíes, acerteste, ye too en castellanu y pa enriba dícennos que lo "llamemos pol so nome".
Ún de los productos más asturianos, que más caltién el lésicu asturianu y que más aquello ta pa promocionar usando la llingua de los que lo producen y lo beben... meyor en castellanu, pa que lo entiendan los de fuera.
Eso sí, si entramos na so web tenemos traducción a la llingua inglesa ¿Habrá que llevar a estos payotos a un cursu de marketing a "Niuyor", pa que sepian lo que ye l'usu de lo local y lo específico como valor añedíu na venta d'un prouctu?

La sociedá "pensante" asturiano ta avinagrao. Habrá que tomalo con paciencia y humor revolucionariu...


Unviao por sacabera a les 9:36 PM

 
RONCONES Y SOTANES.



Cunten unos gaiteros de bona fe que tuvieron hai poco en Cuadonga, ñeru más que d'identidaes, de mazcayaes (...al mazcayu de Pelayu, tan demócrata y cristianu remanando la hestoria al so bedríu... -Dixebra dixit-) qu'unu d'esos que visten de prieto y lleven un chismín p'alzar el pescuezu púnxose bien nerviosu pola visita de la Banda (de Gaites) de Corvera. Pero nun ye porque fore la de Corvera, paez ser qu'al llicenciáu pol altísimu nun-y prestaba, en xeneral, l'asuntu de les gaites. Dicen que dixo, l'individuu esti, qu'ellí, en Cuadonga (fuera d'esi mostru de piedra que llamen Basílica, o seya, nel llugar) NUN SE PODÍA TOCAR LA GAITA. Hom, esto n'Asturies pue tener delles llectures, pero axustándonos a la más lliteral, hai que como poco, preocupase. Los turistes estasiaos miraben más pa les gaites de los gaiteros que pa la basílica y que pal cura cafiáu, y nun sé que me da a min, que perhí vien el cafie del pingüín (taba fríu'l día, por cierto). Mentanto, los probes gaiteros asimilaben l'anuncia y entrugaben-y a aquel home si pelo menos podíen facer un solu de percusión... :S

Y too esto, ¿pa qué? Pa demostravos qu'a la xente que vien a visitar esti país "móla-yos" más sentir como ronca una gaita, que sentir como ronca una sotana. Por muncho que seya en Cuadonga.
Unviao por Lluz a les 12:01 AM