Comentarios sobre l'actualid· d'Asturies y del mundu por persones venceyaes a Izquierda Asturiana (IAS) http://www.ias.as Los comentarios nun representen necesariamente los posicionamientos del partÌu sinon de les persones que los escriben. M·ndanos los tos comentarios o aportaciones a contacta@ias.as

 
POLA DIGNIDÁ D'UN PUEBLU, RESPETU A LOS SOS SÍMBOLOS D'IDENTIDÁ: SOLIDARIEDÁ COL PAÍS LLIONÉS.

Paez normal pensar que nun edificiu oficial d'un sitiu apaeza la bandera d'esi sitiu, ye custión de xacíu. Por estensión ye fácil pensar que na Universidá d'un llugar asoceda lo mesmo. Pos non, la esceición tenémosla bien cerca, nel pueblu vecín de Llión.

Nun sé qué pue pasar pela tiesta del rector de la Universidá llionesa, Ángel Penas, pa llegar a la conclusión de que na Universidá qu'elli mesmu dirixe nun tea la bandera que la representa dientro de la universalidá como institución cimera de la cultura d'un pueblu.

Los universitarios y non-universitarios llioneses tán recibiendo d'esti mou un castigu inmerecíu, y lo que manca entá más, dende so propia casa. El llionesismu en particular y los llioneses en xeneral tán retrucando esti crime ensin xustificación, resultancia namás, de la testonería d'un puntu que cunta con (desgraciadamente) muncho más poder que los que protesten.

Dende equí llevántase una voz más pidiendo que la bandera de Llión tea en tolos edificios de la Universidá au seya menester, símbolu del respetu y la dignidá del País Llionés y la so identidá. Nun fai falta ser llionesista nin progre pa entender cosa tala, porque eso señores caderalgos y rectores... entiéndenlo hasta les peñes.

Solidariedá dende Asturies.

Unviao por Lluz a les 2:50 AM

 
LO QUE NOS VIEN (SI NUN SOMOS A TORNALO)

Güei nel diariu El País aprucíen dos noticies de les que dexen a unu esmolecíu. Sigún una reciente encuesta casique'l 25% de la ciudadanía francesa taba d'alcuerdo coles propuestes de Le Pen sobre inmigración... y lo que pior, cuasi'l 70% afirmaba qu'hai un escesu d'inmigrantes nel país. Francia, la patria de la Revolución, de la Comuña de París, de Sartre, de Simone de Beauvoir d' Albert Camus y otros tantos y tantes abraza les idees d'un facista (d'esi facismu homologáu que trunfa en toa Europa) colo que queda demostrao que'l cataclismu electoral que barrió del mapa a la isquierda tradicional (PSF y PCF) foi daqué más que conyuntural. Al tiempu, na mesma páxina del mentáu periódicu dabase anuncia de la entrada nel gobiernu del cabezaleru de la derecha xenófoba de Suiza, l'empresariu Christoph Blocher, tres vencer nes votaciones a la candidata democristiana nel parlamentu helvéticu.

Estos dos acontecimientos dan muncho que pensar. El facismu, lloñe que quedar enterráu nos detritus de la hestoria, vuelve a andar Europa. Concretamente, tien muncha relevancia el casu francés. Esta república ye, cuantayá, espeyu del futuru cercanu, de lo que más "temprano que tarde" puede ser la norma nel restu d'esta vieya Europa. Ente'l desarme ideolóxicu de la socialdemocracia (sí, en Francia el PSF ye socialdemócrata) y de los vieyos PCs, desurde, adulces, una estrema izquierda que ya anunció va poco la so voluntá de dar la batalla nel tarrén electoral. La LCR y Lutte Ouvrière (dambes dos de tendencia troskista) axunten voluntaes nuna coalición pa les prósimes elecciones rexonales y europees... sigún delles encuestes algamen una simpatía de votu de más del 30%.

Mientres que na República Francesa se ta viviendo esta auténtica revolución nel mapa sociopolíticu, nel Reinu d'España les coses van per otru llau. El PP sigue cola so ofensiva neofranquista, cargada de nacionalismu español, y de nulu respetu a la llibertá d'espresión y de pensamientu. Con too, en dellos casos tan siendo a tornar esta mareona. Les recientes elecciones catalanes son bona muestra de lo que ye romper el bipartidismu, aportando dende la isquierda, el republicanismu y el catalanismu una alternativa pa toa esa xente que, como vimos nel casu de Francia, ya nun cree a les fuerces tradicionales.

Francia vs. Cataluña. Curiosa comparación. Romper el bipartidismu dende la derecha populista y facistoide, o dende un nacionalismu progresista de nuevu cuñu, non etnicista nin románticu sinón dende postures republicanes ya integradores (la nación de los ciudadanos y les ciudadanes). N'Asturies (y n'España) el modelu tradicional (PSOE/PP/pc) va cayer tamién en bancarrota. Ye cuestión de tiempu. La responsabilidá del asturianismu d'izquierdes ta ehí, facer que los nuestros conciudadanos vean qu'hai otres formes de facer les coses o dexar qu'esa nueva estrema derecha (de momentu acoplada nel PP) enllene'l vaciu d'esa mayoría silenciosa que perdió toa esperanza cívica.

Unviao por reteyón a les 9:13 PM