Comentarios sobre l'actualidá d'Asturies y del mundu por persones venceyaes a Izquierda Asturiana (IAS) http://www.ias.as Los comentarios nun representen necesariamente los posicionamientos del partíu sinon de les persones que los escriben. Mándanos los tos comentarios o aportaciones a contacta@ias.as

 
Arte políticu.

Nun ye un bilordiu , na prósima edición de la “Feria Internacional de Arte Contemporáneo” , ARCO 05, , van poner una conferencia les Gerrilla Girls pernomáu colectivu feminista anónimu n’identidá y númberu que vien desendolcando una actividá frenética dende que nacíó allá pel añu 1985, n’una nueche, na que les sos integrantes fundadores, con unes mázcares de gorila mangaes na cabeza como marca de la casa, entafarraben too Broadway de cartelos que taben llamaos a pasar a la hestoria de l’arte. Un d’ellos, el más famosu, yera una versión de la obra mayestra d’ Ingres, “Gran Odalisque” a la que-y poníen una tiesta de gorila , que elles titulaben: “¿Tien una muyer que desnudase pa entrar nel Metropolitan Museum?.

Colos años estes mozes, que se consideren elles mesmes como “la consciencia de l’arte “ lleven una recatafila d’esposociones, preformances y conferencies, amás d’una bona ristra de llibros asoleyaos, l’últimu un catálogu ilustráu d’estereotipos femeninos, “ Putes y pelgares rompegüevos” que ta faciendo-yos per poca gracia a los paisanonos, como yera d’esperar.

Tuvo bien, na cabera entrega los Oscars, cuando elles punxeron nuna valla publicitaria xigante una estatuina del troféu modificá, pintá de blanco y con unos xenitales bultablemente masculinos que dicía “Home y blancu como los que lu ganen” y que dempués amestaba: “ Tamién el Senáu ye más progre que l’Academia: 14 % de muyeres senaores, 4 % de muyeres directores de cine”.

Asina y too ye rara la cita del arte mundial n’onde elles nun participen aprovechándose con eficacia de ser un de los casos que-y sirven al mercáu pa curase en salud, daqué común nestos días pues nada nin nadie se llibra de ser asimilao y dixerío pola corriente principal. Conscientes d’esto saben que el so llabor tien que sobrevivir n’esa cuerda floxa , cosa que solucionen con un humor propiu característicu que se yos agradez porque ayuda a fender la creencia de que’l feminismu ye daqué aburrío, condescendiente y quexono.

Elles son les herederes d’un arte que na década de los 70’s intentaba, entre otres munches coses, redescubrir la obra de muyeres que habíen fecho contribuciones clave pero sio ignorades pola crítica patriarcal. Esto nótase cuando apaecen nes conferencies revestides de gorilas usando’l sobrenome d’artistes ya desapaecíes, faciéndoyos homenax y reconocimientu como les inolvidables Sofonisba Anguissola (sXVI), Artemisa Gentileschi (sXVII) o Vigée-Lebrun (sXIX) que tuvieron que convertise en pseudo-homes pa siguir trabayando cola materia sublime, persecuciones, esclusiones y agresiones pol medio, como les que sufrió la Gentileschi, violada y enriba culpabilizada, que mos describieron a les clares la imaxen de la muyer como perdedora absoluta del progresu y de la revolución burguesa, a la que nun-y quedaba otra salida que el feminismu. ¡ Si King Kong llevantare la cabeza!.


Dende Xibraltar Molly Bloom.



Unviao por molly bloom a les 3:28 PM

 

Unviao por Suari a les 11:28 AM

 
EL PAÍS DE LES PUDRICIONES

¿Quién diba dicir qu'esti weblog yera tan modernacu? Sacar primero que'l suplementu xuvenil del diariu El País un reportaxe sobre Le Tigre, en principiu, tien abondu méritu. Pero bueno, sin cayer no pretencioso, mala comparación tien l'artículu d'esi bodríu infumable fechu suplementu cola nuestra Molly Bloom. Nun ye sólo que lo que pudimos ver güei nel periódicu "progre" del estáu fixere un repás epidérmicu dafechu de la trayectoria de Le Tigre, centrándose más n'aspectos folcloricos que na verdadera miga d'un grupu tan interesante. Nun ye que l'artículu anexu sobre grupos "militantes" diere grima (meciendo'l folixerismu col discursu políticu)... ye que pa colmo el o la responsable d'escribir una artículu a páxina completa sobre Le Tigre nun sabe nin los discos que tienen: Femminist Sweepstakes ye'l segundu llargu na carrera d'estes moces!! (escaecer "Le Tigre" ye llamentable porque amás de ser el primeru ye de llargo'l más recomendable). En fin, que poco podemos esperar d'un suplementu que tien por "alternativo" auténticos monográficos sobre la moda de los festivales indies del estáu (sic).

Pero bueno, sobre música y política ya nos ilustrará más Molly que d'eso sabe bien d'ello. Hai alternatives (con discursu políticu) acuyá del País de les Tentaciones. ¿Sabrán del compromisu de grupos como Stereoab, Belle & Sebastian, Fugazi, etc.. o d'históricos como los Smiths, Housemartins, McCarthy, etc..?

Artículos sobre esta cuestión podeis alcontralos na revista La Dinamo de Madrid, vinculada tamién con un grupu nuevu que: "nació con un propósitu a lo menos polémicu: facer pop n'español sin que fuere de dereches": Garzón ("n'honor" al famosu xuez).





Unviao por El a les 5:17 PM

 
CONCEYU ABIERTU: UN ESPACIU NUEVU PAL DEBATE

Allá pel añu 1996 echaba a andar el Llar Solidariu, un espaciu físicu común onde SOS Racismu, Xega, la Xunta pola Defensa de la Llingua Asturiana y COSAL desenvuelven la so actividá y convitiéndose con ello nún auténticu referente del rebuyir militante de los movimientos sociales nel país.

Agora, 8 años depués, echa a andar dende la base del própiu Llar Solidariu una iniciativa nueva y necesaria: el Conceyu Abiertu. En palabres los y les entamadores "abrimos agora esti espaciu nuevu, Conceyu Abiertu, a toles persones y organizaciones que compartan estes inquietúes, que tean en desalcuerdu con esta sociedá onde la competencia apodera a la solidaridá, y el cultu al dineru y al ésitu son el valor cimeru, y convidámoslos a que vaigan a les actividaes que se programen."

Ayeri miércoles inaguraben con una rueda de prensa y teatru lo que ha ser un referente pal conxuntu de la ciudadanía más dinámica del país. En próximes feches entamen una riestra d'actividaes enforma recomendables. Apurrímosvos darreo les primeres:

[Vienres 14] 19.30 h Ciclu: EL MUNDU NEL QUE VIVIMOS
"El mundu nel que vivimos", presentación del ciclu
Intervién: Miguel Romero, director de la revista VIENTO SUR

[Xueves 20] 19.30 h Charla-debate "La normalidá cultural occidental"
Intervién: Juan Antonio Herrero Brasas

[Martes 18] 19.30 h Charla-debate
"Les mios vivencies"
Intervién: José Manuel García Peruyera, deportáu en Matthausen

[Vienres 21] 20.00 h Charla-debate
"La Constitución Europea: una crítica dende la ecoloxía y la solidariedá"
Intervién: Tom Kuchars, miembru de Ecoloxistes n'Acción y ún de los organizadores de la Consulta Social Europea

[miércoles 26] 20.00 h Medios de comunicación alternativos
Presentación del periódicu Diagonal
Intervién: Decio Machado

[Vienres 28] 19.30 h Xornaes: REFORMES ESTATUTARIES
"Plurinacionalidá, reformes estatutaries y Constitución Europea"
Intervién: Jaime Pastor

[Sábadu 29] 10.30 h
"Catalunya y la reforma de los Estatutos d'Autonomía "
Intervién: Ricard Martínez

[Sábadu 29] 12.30 h
"El Plan Ibarretxe y la reforma de los Estatutos d'Autonomía"
Intervién: José Ramón Castaños "Troglo"

[Sábadu 29] 17:30 h
Mesa redonda: "La reforma del Estatutu Asturianu"
Intervienen: Andecha Astur, Bloque por Asturies, Izquierda Asturiana, Izquierda Xunida d'Asturies, Unión Asturianista.
Toles actividaes van desarrollase nel Llar Solidariu:
cai La Gascona, 12 Baxu A [Uviéu]

Podeís atopar más información sobre esti Conceyu Abiertu na so web.



Unviao por Administrador a les 6:01 PM

 
Música y política.

L’ultimu discu de Le Tigre, “This island”, “Wiija records”, ochobre 2004, ye una muesa de cómo estes moces van aumentando, añu tras añu, el caudal de discursu nes sos composiciones. Cada vez tienen más que contar. La música d’elles, agora, ye la ciudá qu'hai al fondu, como una banda sonora de les sos peripecies , onde vive xente que d'una forma o d'otra yos impide ser llibres del too. Eso sí , sin faltar un ramalazu como “Seconds” que mos regresa a les trepidantes rimes del so primer álbum “Self Titled” y qu'asoma la patuca de lo que si-yos da la gana pueden facer pa que nun paremos de bailar y de reinos.

Esti trío neoyorquín entamó la so andadura allá pol añu 1998 de resultes la disolución de Bikini Kill, otra banda referencial, cola idega de faer una música feminista ensin complexos, declaradamente politizada y combativa, El propósitu yera igual de buenu que difícil pero salio-yos bien. Foi la canción “Deceptacon” la qu'a munchos yos fizo parase a escuchar aquel soníu tan rápidu y electrízante que finaba d’una cachada coles zunes de la música indie de los años 90, onde abundaba'l paisax murniu y la tristura. Terminaba’l mundu de la estética de Blue Velvet y entamaba otru onde les muyeres invadíen masivamente'l rock’n’roll pa cambialu d’arriba abaxo.. La frescura acababa de ponese nel centru de les nociones básiques y el romanticismu morría d'una certera puñalada fecha de chicle bang bang, eléctricu a base de coros y ritmu de la selva, eso sí fecha con steel&concrete.

Pa les que quiximos tirar más del filu les sorpreses nun pararíen de llegar. A una música intensa sumábense unes lletres qu'esplícitamente trataben temes rellacionaos colos problemes qu'abluquen a les muyeres na era ultramoderna, onde esponen con humor les sos dubies acerca de la identidá de Cassavettes o la necesidá d'unise p'algamar la igualdá. Gústa-yos enllenar los sos discos y páxines web con referencies a los llibros , artistes o músicos que yos presten. Ahí reside una de les mas útiles fuentes pa escudriñar d’ ónde vien tanta clase. Son fondes conocedores de la obra de Simone de Beauvoir , una de les pensadores qu'aconseyen, y recomienden la llectura d’un llibru qu'ensin dubia ye clave pa entender lo que pasa nel arte dende va tres décades; con proyección bultable na sociedá d’anguaño y que dende esti weblog suxerimos con puxu “The power of feminist art: the american movement of the 1970’s. History and impact” de les impagables Norma Brude y Mary D. Garrad que nun trabayu exhaustivu compilen les obres que se consideren antecedentes d'esti movimientu artísticu/ musical/políticu del que son pica del iceberg Le Tigre.
Al falar d’elles nun se pue pasar ensin citar “Riot Grrrls” ensame a la vez semilleru d’aiciones y obres d'arte feminista que se desendolcó na década de los 90’s y que tien el guañu nos incomparables e inatopables fanzines “Quit Whining” y “Girl Germs”, xoyes de l'autoedición fotocopiada y subversiva que foron abriendo camín pa lo qu'agora fierve y fierve ensin aparar. Les muyeres tomaron les riendes de la música popular y truxeron aire bastante pa otra década entera como mínimo, de la que ya va la metá.

Tienen asoleyaos cinco discos de llarga duración toos editaos por “Wiiija records” y “Everlasting records”:

-Self Titled, LP, 1999

-From the desk of Mr. Lady , EP, 2001

-Femminist Sweepstakes, LP, 2002

-Remix, LP, 2003

-This Island, LP, 2004

Pa la que quiera conocer abondo más d’esti grupu de elctropunk políticu son bien afayadices estes páxines enllenes de datos, biografíes, bibliografíes y buena música:

http://www.letigreworld.com/
http://www.lttr.org/

y p'aprosimase a un de los casos ibéricos más asemeyaos:

www.girlslikeporno.com

Molly ( Marion Tweedy) Bloom.




Unviao por molly bloom a les 7:38 PM