Anuncies y opiniones dende la Izquierda asturiana |
|
|
Comentarios sobre l'actualidá d'Asturies y del mundu por persones venceyaes a Izquierda Asturiana (IAS)
http://www.ias.as
Los comentarios nun representen necesariamente los posicionamientos del partíu sinon de les persones que los escriben.
Mándanos los tos comentarios o aportaciones a contacta@ias.as
Archivu
|
28.2.05
DOBLES VÍCTIMES  El prósimu Viernes 4 Begoña Zabala (d'Emakume Internazionalistak) va falar nel Conceyu Abiertu d'Uviéu (Cai la Gascona 12-baxu A) sobre "la Feminización de la pobreza" a les 19,30 hores. Una bona oportunidá pa tomar concencia d'un asuntu que suel quedar en segundu planu en tolos debates sobre les consecuencies del modelu dominante nel actual procesu de "globalización" neolliberal. Mesmo nel pasáu referéndum sobre la constitución de la UE sintiéronse voces dende'l feminismu calificando'l tratáu como "Un marcu nuevu p'afitar desigualdaes de vieyo".Hasta que llegue'l vienres podemos dir caleciendo motores cola llectura de textos interesantes sobre la tema, dalgún de la propia Begoña , o mesmamente los artículos publicaos va unos añinos n'ias.as con motivu del Día de la Muyer y que ya falaben d'estos asuntos. 11.2.05
UNA CAMPAÑA ATÍPICA  Esta selmana entamaba la campaña electoral pol referéndum sobre la constitución europea, una campaña con delles particularidaes que la fain estraña, atípica y con visos de surrealismu. Una campaña que contrasta dafecho cola de les últimes xenerales onde por cuenta de los postreros 4 años d'aznarismu vivióse una auténtica tormenta sociolóxica espeyada n'asuntos tan tristes como la guerra preventiva n'Irak, una fuelga xeneral, etc... acabando nel desgraciáu atentáu del 11-M que tiñó de sangre'l sentir políticu y moral de bona parte de la ciudadanía. Foi aquel un contextu mui nocivu pa les fuercies polítiques que, lloñe d'un heredáu forofismu políticu tendente al bipartidismu, tentaben esparder discursos alternativos. Los resultaos de la izquierda alternativa, del nacionalismu, etc. foron los que foron nun contextu de movilización social que, eso sí, acabó barriendo la escura figura d'Aznar del gobiernu del Estáu. Agora, con nuevu talante de ZP, llega un referéndum d'abonda importancia pal futuru desenvolvimientu d'Europa y lóxicamente, tamién d'Asturies. La falta d'interés de la ciudadanía por esti procesu electoral ye evidente. Poca xente conoz el conteníu del tratáu constitucional (ensin procesu constituyente popular), pocu interés hai por explicar el so conteníu, y poca participación s'albidra pal próximu 20 de febrero. Los partíos, movimientos sociales, sindicatos... van tomando posiciones adulces, pero paez que cola boca pequeña. Si en países como Francia lleva desenrollándose un debate sobre'l documentu constitucional dende va munchos meses, cola participación de bona parte de la sociedá (debate afaláu por colectivos como ATTAC) nel Reinu d'España podemos alcontrar una campaña folclórica y folclorizante entamada pol gobiernu ZP. Butrageño, Los del Río, Antonio Gala son delles de les estrelles invitaes a pidir el votu (afirmativu) nel referéndum. Europa como tótem, como mitu intocable, como verdá absoluta ya indiscutible ye un productu de mercadotecnia qu'escluye a toles voces crítiques que, acusaes pola intelectualidá progre de combayar cola extrema derecha tan condenaes a facer esfuerzos titánicos por explicar la so postura (primero hai que xurar fidelidá a la gran Europa pa, darreo, poner les pegues cola boca pequeña). Mención aparte merez la derecha española. El PP subió a un carru ganador de toes toes. Si'l resultáu electoral ye un imponente SÍ, Rajoy & cia. asumirán bona parte de la responsabilidá del éxitu. Si d'otra miente, el NON saca un númberu de votos bultable, van amarrase al argumentu de que'l referéndum foi, en realidá, una plebiscitu sobre'l gobiernu socialista. Los sectores más bederres d'esa derecha, representaos na figura del showman Jiménez Losantos tan faciendo una campaña brutal consistente en "Si ZP pide'l Sí, nós pidimos el NON": surrealista.N'Asturies les coses nun se distiguen muncho del contextu estatal. Les posiciones son calcos de lo expuesto nos párrafos caberos. El PSOE montó una plataforma folckorico-intelectual liderada por Quini y l'ex-comunista Mariano Artos. El PP que vien pidiendo'l sí (con pocu rixu), tien el llombu cubiertu por históricos como Juan Campos Ansó (históricu derechista n'hores baxes pola so fidelidá a Álvarez-Cascos) que pide'l NON de Jiménez Losantos.  En conclusión tamos ente un referéndum atípicu pola pola falta de debates de fondura, pol secuestru de la razón en nome d'esi bien supremu que ye la Europa del porque sí (porque ye Europa y puntu), y sobre too pol divorciu ente la clase política gobernante y una ciudadanía a la que poco-y ta interesando un asuntu que desconoz, que-y repuna y que pocos tamos intentando explicar.Con dar una vuelta per Xixón (y otros conceyos asturianos) podemos danos cuenta de que nin los interesaos a priori porque esti referéndum sea un éxitu tan faciendo trabayu nengún. Los tableros destinaos a la publicidá electoral taben, tovía ayeri, vacios. D'ehí que la presencia de los carteles d'IAS rescamplara ente la color del cochu o de los carteles esblanquiñaos de dómines pasaes (tovía quedaben cachos de carteles del BIA). Por cierto, cuentes les males llingües que la selmana pasada, el rockeru Loquillo, conocíu por cantares d'éxitu como "Para ser feliz quiero un camión", y por llevar años repitiendo esi otru cantar entituláu "Vota PSOE" foi víctima d'otru cantar menos líricu nún conocíu chigre xixonés:"Se reserva el derecho de admisión" . ¿Será pa tanto? |