Comentarios sobre l'actualidá d'Asturies y del mundu por persones venceyaes a Izquierda Asturiana (IAS) http://www.ias.as Los comentarios nun representen necesariamente los posicionamientos del partíu sinon de les persones que los escriben. Mándanos los tos comentarios o aportaciones a contacta@ias.as

 
ESPACIU FEMENÍN

Artículos, reseñes , notes biográfiques y reportaxes afondarán pronto na vida d’una muyer que se noma Eileen Collins; la muyer que'l próximu día 15 de mayu, si les coses salen como tan previstes, va facer de comandante na misión del trasbordador espacial STS 114-Discovery.

Ye raro qu’una representante del so xéneru tenga encomendao esta gran responsabilidá. Namás en dos ocasiones se dio esti casu. L’última vegada foi la mesma Collins, a los mandos de la misión STS-93 ( que llevó a l’espaciu esterior l’observatoriu Chandra de rayos x ) y l’otra vez, además la primera na qu'una fémina surcaba'l cosmos, ye’l vuelu pioneru de la cosmonauta soviética Valentina Vladimirovna Tereskhova, nel añu 1963 qu'al dir sola na nave ostentó’l cargu de comandante.

Pero esta ocasión ye especial porque’l Shuttle lleva dos años llargos nel dique secu a resultes de la traxedia del Columbia qu’en febreru de 2003 desintégrose nes capes altes de l’atmósfera de la que facía la maniobra de reentrada, dempués d’una esitosa misión científica, morriendo nel actu los siete astronautes que diben dientro. Dende esi aciagu día los trabayos de construcción de la Estación Espacial Internacional ISS tan paraos; tan solo se lleven a cabu llabores de mantenimientu y dellos esperimentos gracies al eficaz sofitu que dan les mítiques naves Soyuz ruses.

De magar pasó l’accidente na Nasa vívese nuna frenética y patriótica cuenta atrás que paez tener el fin nesti mes de mayu. Enantes de dar el “go” el trabayu de miles d’inxenieros tará pendiente de los detalles más nimios porque'l fracasu ye daqué que nun pue dase nesti llanzamientu; un factor col que nun se pue contar. Si esti vuelu nun sal bien los trasbordadores tendríen que ser retiraos pa siempres lo que dexaría a los USA fuera de los vuelos tripulaos hasta que se diseñara una nave nueva (puen ser diez años) amás de parar sine díe la construcción de la ISS. Con estos datos podemos imaxinar la responsabilidá que tien esta muyer al tar sentada nel sillón izquierdu del Shuttle: el reserváu pa los comandantes d’esti avión que despega de pie.

Ye la nomada misión de “Return to Flight” a la que los estadounidenses tan afayaos porque ya tuvieren que pasar por daqué igual nos años 80, cuando’l Challenger yos españó delantre los güeyos convirtiendo n’imáxenes, en metá de la postmodernidá, la teoría de les catástrofes.

El trasbordador espacial será un de los recuerdos perdurables de la nuestra era. Esa catedral de tres torres que s'eleva ingrávida nel aire llevando al cuello un avión con forma de delta onde viaxa xente que tresciende les fronteres de la Tierra.

Ta claro qu'Eileen Collins ye una muyer única, fecha de fibra pura anque l’escuenda detrás d’esa cara de neña responsable y educada que siempres ta a puntu rise. Una espresión mezcla d'autocontrol y asombru que reflexa la so personalidá, blindada contra’l desánimu.

Son incontables les hores qu’esta matemática nacía en New York en 1956, dedicó a entrenase, cuidase, esforzase más, hasta conocer l’últimu requexu de la nave, ca pieza, ca procedimientu, y convertise col pasu del tiempu nuna veterana astronauta. De xuru que se mordió los llabios de rabia contemplando l’infortuniu, de los sos compañeros del Columbia que dexaben esteles fatales de fueu y de fumu so’l cielu de Texas.

Molly Bloom.
Unviao por molly bloom a les 4:15 PM

 
L'ÚLTIMU VOLADOR

L'últimu volador. Milio Rodríguez Cueto. VTP Editorial.

Unviao por El a les 12:14 PM