Xuntar les lluches pa entamar una respuesta

La unidá na cai de tolos sectores en crisis ye clave pa xenerar una respuesta social y una alternativa a la crisis

La unidá na cai de tolos sectores en crisis ye clave pa xenerar una respuesta social y una alternativa a la crisis

La unidá na cai de tolos sectores en crisis ye clave pa xenerar una respuesta social y una alternativa a la crisis.

Izquierda Asturiana (IAS) saluda la criación del frente d’unidá obrera formáu poles asamblees de trabayadores d’empreses en crisis, como Tenneco, Coca Cola, Cocinas Asturianas, Benito Sistemas, Liberbank-Cajastur, Subcontrates d’Hunosa o Mataderu de Noreña, asina como los afectaos pola intoxicación con mercuriu d’Asturiana de Zinc. La concentración fecha güei vienres n’Uviéu delantre los xulgaos ye un pasu prestosu y interesante na visibilización de la unidá necesaria pa continuar les lluches escontra los EREs y el lladrociniu institucionalizáu.

La crisis nun ye nueva n’Asturies. Nun llegó en 2008, sinón qu’arranca de la mesma caducidá del modelu productivu asturianu que tuvo operando n’Asturies per sieglu y mediu y qu’entra nun procesu terminal cola integración del Reinu d’España na CEE, anguaño Unión Europea. N’Asturies llevamos décades de reconversión industrial, minera y agropecuaria, como llevamos décades d’emigración forciada de la mocedá. A lo que tamos asistiendo agora ye a un agravamientu d’esi procesu como resultáu de la crisis financiera internacional y de les respuestes que se tán dando a la mesma dende les instituciones, como la Troika y los gobiernos español y asturianu.

Yá nun hai un sector fuerte abondu por sí solu como pa entamar una llucha qu’arrastre al conxuntu de la sociedá asturiana, como pasaba hai años col metal o la minería. Tampoco les grandes centrales sindicales como CC.OO. y UGT tienen la menor intención de facelo, y la fracasada fuelga minera de 2012 ye l’amuesa más evidente d’ello. Adulces, van saliendo los EREs qu’achuquinen o reducen a la mínima espresión decenes d’empreses qu’echen a la cai a miles de trabayadores. Namás la unidá de tolos sectores en llucha, y la converxencia colos más de 100.000 persones desempleaes qu’hai n’Asturies, colos afectaos polos retayos, colos empleaos públicos, colos trabayadores de les empreses qu’aguanten, seyan estos fixos o precarios, pue valir pa torgar la situación.

Y nun ye solo movilizase. L’añu 2013 pasámoslu faciendo un cientu de manifestaciones pa protestar pola situación, pero tovía la esquierda sindical y política asturiana nun foi quien a plantegar una alternativa, un programa de llucha, una conseña detrás de la cuala asaltar, sinón el cielu, polo menos l’abellugu de quien ta diseñando un futuru de precariedá y probitú pa la inmensa mayoría d ela población.

Toles iniciatives que sirvan pa xenerar una llucha unitaria con un programa claru son bienveníes. Tolo que sirva pa visibilizar la llucha de los trabayadores y pa texer redes de solidariedá ente ellos ye positivo. Izquierda Asturiana (IAS) fai un llamáu a la participación nes mesmes. Porque la salida nun ye individual, sinón colectiva. Xuntos somos quien.

Dirección Nacional d’Izquierda Asturiana (IAS)

Los comentarios están cerrados.